MIB va DXX Samarqand viloyati boshqarmasi xodimlari hamkorligida o‘tkazilgan tekshiruvda diametri 500 millimetr bo‘lgan gaz quvuriga yashirin ravishda ulanib olgan shaxslar qo‘lga olindi. Bu haqida “Daryo”ga viloyat prokuraturasining axborot xizmati ma’lum qildi.
Ta’kidlanishicha, fuqaro I.B. va uning jinoiy sheriklari o‘zlariga tegishli bo‘lgan Samarqand tumani “Yuqori Chordara” mahallasida joylashgan issiqxonalarda tabiiy gazdan foydalanish uchun ta’minotchi korxonadan tegishli ruxsatnoma olmasdan, issiqxona yonida joylashgan diametrli 500 millimetr bo‘lgan gaz quvuriga yashirin ravishda ulanib, davlatga 360 million so‘m iqtisodiy zarar yetkazgan.
Aniqlanishicha, mazkur quvur Qurolli kuchlar kichik mutaxassislarini tayyorlash markazi hududidan Samarqand shahri aholisiga tabiiy gaz yetkazib beruvchi quvur bo‘lgan.
Mazkur holat yuzasidan Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik) bilan jinoyat ishi qo‘zg‘atilgan bo‘lib, viloyat prokuraturasining uyushgan jinoyatchilik va iqtisodiy jinoyatlarga qarshi kurashish bo‘lim tomonidan tergov harakatlari olib borilmoqda. Fuqarolar I.B. va M.E. 2021-yilning 6-yanvar kuni gumonlanuvchilar tariqasida ishda ishtirok etishga jalb qilinib, qo‘lga olingan.
Izoh (0)