Бутун дунё бўйича 2020 йилда ўта қашшоқлик даражаси сўнгги 22 йил ичида биринчи марта ошган. Бу ҳақда БМТ бош котиби Антониу Гутерриш БМТ Хавфсизлик кенгашининг тинчлик ва барқарорликни сақлашга бағишланган видеоформатдаги мажлисида айтиб ўтди, деб ёзади «ТАСС».
Бош котиб таъкидлашича, коронавирус пандемияси бир қатор салбий тенденцияларни чуқурлаштирган. «2020 йилда ўта қашшоқлик даражаси 22 йил ичида биринчи марта ўсди, — деди у. — Нозик вазиятда ва низолар шароитида иқтисодий фаолликнинг пасайиши қўшимча яна 18 дан 27 миллион нафаргача одамни қашшоқликка келтириши кутилмоқда».
Гутерриш, шунингдек, бутун дунёда «гендер тенгсизлик чуқурлашаётганига, инклюзив ривожланиш учун асосий драйвер сифатида ишлаётган аёллар улуши нуқтаи назаридан дунё бир неча ўн йилга ортга қайтгани»га эътибор қаратди.
«Агар биз қашшоқлик ва низолар доирасини узмоқчи бўлсак, бизга барқарор ривожланиш мақсадларида белгилаб қўйилган иккита тамойилга асосланган янада журъатлироқ ёндашув керак», — деган жаҳон ташкилоти раҳбари.
«Биринчидан, бу ўзаро боғлиқлик: тинчликсиз барқарор ривожланиш ва барқарор ривожланишсиз тинчлик бўлиши мумкин эмас, — деди у. — Иккинчидан, жалб қилиниш. ‘Ҳеч кимни орқада қолдирмаслик’ мажбурияти барқарор ривожланишни илгари суриш ҳамда низоларнинг олдини олиш ва уларни ҳал қилиш бўйича интилишларимиз марказида бўлиши керак».
Изоҳ (0)