Тошкент шаҳрида йўналишлар тармоғини мақбуллаштириш ишлари амалга оширилмоқда. Бу ҳақда пойтахт Транспорт бошқармасига таяниб, «Тошшаҳартрансхизмат» матбуот хизмати хабар берди.
Маълум қилинишича, 2020 йил 27 декабрь санасидан Тошкент метрополитени Чилонзор йўналишининг давоми — 5 та бекатдан иборат Сергели ер усти метро йўналиши ишга туширилиши муносабати билан 2021 йил 11 январь санасидан 8, 32, 38, 80,131, 132, 133-сонли автобус йўналишлари мақбуллаштирилади.
Хусусан, Сергели 7-мавзе—Чилонзор 25-даҳа йўналиши бўйича қатнаган 8-сонли автобус йўналиши ёпилаётган бўлса, Сергели 7-мавзедан «Ўзбекқишлоқмаш» заводи йўналиши бўйича қатнаган 38-сонли автобус йўналиши ҳаракати узайтирилмоқда.
Бу Вазирлар Маҳкамасининг 2020 йил 16 мартдаги «Тошкент шаҳар йўловчи транспорти тизимини такомиллаштириш чора-тадбирлари тўғрисида»ги 157-сонли қарорига асосан автобус йўналишларининг ўзаро ҳаракат йўналишини такрорлашини камайтириш мақсадида амалга оширилмоқда, дейилади хабарда.
Аввалроқ Тошкентдаги икки автобус саройини вилоятга кўчириш режалаштирилаётгани тўғрисида хабар берилганди.
Изоҳ (0)