“Mana, bir yil o‘tdi, endi xalqning oldiga chiqish kerak”. Senat raisi Tanzila Norboyeva deputatlarga topshiriq berdi

Fuqarolar o‘z murojaatini ijtimoiy tarmoq orqali yo‘llash urfga aylanib boryapti. Bu haqda Oliy Majlis Senatining o‘n birinchi yalpi majlisida senat raisi Tanzila Norboyeva aytib o‘tdi.

Tanzila Norboyevaning ma’lum qilishicha, Oliy Majlis Senatining mahalliy kengash deputati faoliyatidan minnatdorlik xatlari bilan birga o‘z deputatini tanimasligi, mahallaga biron marta kelmaganligi, murojaat etsa, umuman javob bermasligi kabi holatlar bo‘yicha ham murojaatlar kelmoqda.

“Bu kabi holatlardan shunday xulosa qilish mumkinki, ayrim deputatlar xalqning vakili sifatidagi vazifasini to‘liq bajara olmayapti. Xalqning o‘zi bir kun kelib deputatga ‘sen bizga nima ish qilib berding, nima foydang tegdi?’, degan savollar berib, qayta saylansin degan talabni ham qo‘yishi mumkin. Shunday ekan, mana bir yil o‘tdi, oz bo‘lsa-da oqu qorani tanib oldingiz, endi xalqning oldiga chiqish kerak. Chiqqanda ham har kuni chiqish kerak. Asosiy maqsadingiz xalqning roziligini olish ekanligini unutmasligingiz kerak”, — dedi Senat raisi.

Norboyeva xonimning alohida ta’kidlashicha, 2021-yildan har bir deputat

• o‘zi saylangan hududdagi saylovchilar bilan muloqotni qat’iy yo‘lga qo‘yishi;
• muammolarni hal etishga ko‘maklashishi;
• asossiz masalani ko‘targan fuqaroga qonuniy tushuntirish bera olishi zarur.

“Ayrim fuqarolar qonunni tushunmagani bois asossiz murojaatlar qilishadi. Deputat shularni erinmasdan aholiga tushuntirib berishi kerak. Mana shu ishlar qilinmayapti va shuning uchun ijtimoiy tarmoqlarda salbiy fikrlar uyg‘onmoqda. Fuqaro o‘z murojaatini ijtimoiy tarmoq orqali yo‘llash urfga aylanib boryapti. Bunday bo‘lishi kerak emas. Shunda u yerdagi deputat, sektor rahbari yoki hokim qani, degan savol tug‘iladi. Nima uchun fuqarolar ijtimoiy tarmoq orqali Prezidentga yoki boshqa mutasaddilarga murojaat qilishadi? Demak, shu yerdagi mutasaddilarning ishi qoniqarli emas. Odamlar shunday qilishga majbur bo‘lyapti”, — deydi Tanzila Norboyeva.Eslatib o‘tamiz, videokonferensaloqa shaklida bo‘lib o‘tadigan yalpi majlisda bir qator masalalar ko‘rib chiqilishi rejalashtirilgan. O‘zbekiston Prezidenti Shavkat Mirziyoyevning Oliy Majlisga yo‘llagan Murojaatnomasida belgilangan vazifalar shular jumlasidandir.

Bundan tashqari, “O‘zbekiston Respublikasining Konstitutsiyasiga o‘zgartirishlar kiritish to‘g‘risida”gi, “O‘zbekiston Respublikasining Shaharsozlik kodeksini tasdiqlash haqida”gi, “Madaniy faoliyat va madaniyat tashkilotlari to‘g‘risida”gi O‘zbekiston Respublikasi qonunlari muhokama qilinishi nazarda tutilgan.

O‘zbekistonda so‘nggi parlament saylovlari 2019-yil dekabrda bo‘lib o‘tgan edi.