Qashqadaryo viloyati Kitob tumani hokimi Alisher Zokirov elektr energiyasi ta’minotida muammolarga duch kelayotgan tuman aholisiga murojaat qilib, hokimlik binosida ham chiroq yo‘qligini bildirdi.
Hokim aholining elektr energiyasi ta’minotidagi uzilishlar ortidan qilingan ko‘plab so‘rovlariga javob berib, chiroq ko‘p o‘chirilayotganiga so‘nggi kunlarda havoning keskin sovib ketishini sabab qilib ko‘rsatgan. Shuningdek, u elektr energiyasi ta’minoti muammosini hal qilish tuman hokimligi imkoniyatidagi ish emasligini, bu uchun respublika tashkilotlariga, Energetika vazirligiga va ta’minotchi soha rahbariyatiga talablar qo‘yilayotganini ma’lum qilgan.
Alisher Zokirov murojaatida o‘zi ham Kitob tumanida yashashini va hokimlik binosida ham elektr energiyasi yo‘qligini, elektr ta’minotidagi uzilishlardan tuman hokimligiga hech bir manfaat yo‘qligini ma’lum qilgan. Shuningdek, elektr ta’minotidagi muammolar hukumat darajasida hal qilinishiga umid bildirgan.
Qadrli tumandoshlar! Otalar, onalar, opa-singillar, aka-ukalar! Tumanda chiroq bo‘lmasligidan tuman rahbariyati uchun hech qanday manfaat yo‘q. Balki, bir muammomiz ikkita va undan ko‘pga ortadi. Biz ahvol o‘nglanishi bo‘yicha harakatimizni bir zum ham to‘xtatmaymiz. Tez orada hukumat darajasida bu holat bartaraf etilishiga ishonamiz.
O‘ylaymizki, siz hurmatli fuqarolar, bu vaqtinchalik qiyinchilik hal etilguniga qadar vaziyatni tushungan holatda baholab, ichki imkoniyatlardan boricha foydalanishga harakat qilasiz. Albatta, umid qilamizki, tumanimizda ham elektr ta’minoti tez orada izga tushadi”, – deydi Alisher Zokirov.
Avvalroq “Qashqadaryo hududiy elektr tarmoqlari” Tallimarjon issiqlik elektr stansiyasidagi har birining quvvati 900 MVt bo‘lgan ikkita energoblok to‘xtaganligi sababli Qashqadaryo viloyatining ayrim hududlari qisman, Qamashi, Yakkabog‘, Shahrisabz tumani, Shahrisabz shahri, Kitob tumanlari esa elektr ta’minotidan to‘liq uzilganini ma’lum qilgan edi.
Mavzuga doir:
Izoh (0)