“O‘zbekiston Markaziy Osiyoda mahkumlar soni eng kam mamlakatlardan biri hisoblanadi” – Ombudsman

Oliy Majlisnig Inson huquqlari bo‘yicha vakili (Ombudsman) Ulug‘bek Muhammadiyev 2020-yilning 29-dekabr kuni Kongress xollda o‘tkazilgan davlat rahbarining Murojaatnomasiga bag‘ishlangan tadbirdan so‘ng “Daryo” muxbiri Mirolim Isajonovga qisqa intervyu berdi.

Ulug‘bek Muhammadiyev xalqaro standartlardan kelib chiqib 2021-yildan 25 ta manzil-koloniyaning bosqichma-bosqich qisqartirilishiga munosabat bildirdi.

25 ta jazoni ijro etish muassasasining tugatilishi shuni anglatadiki, avvalo, yurtimizda olib borilayotgan ochiqlik va adolatlilik siyosati tufayli hamda Prezidentimizning tashabbusi bilan afv institutining qo‘llanilishi natijasida yildan-yilga mahkumlar ozodlikka chiqib, ularning soni kamaymoqda, jazo muddatlari qisqarmoqda. Shuni alohida qayd etish kerakki, bugungi kunda O‘zbekiston Markaziy Osiyodagi davlatlar ichida mahkumlar soni eng kam mamlakatlardan biri hisoblanadi. Sobiq Ittifoq davrida ochilgan manzil-koloniyalar yildan-yilga bo‘shab bormoqda. Shu sabab ular qisqartirilyapti, bu juda to‘g‘ri qaror. Ushbu jarayonlarni dunyo hamjamiyati ham kuzatib turibdi.

Davlat rahbari o‘z Murojaatnomasida jazoni yengilrog‘i bilan almashtirish va shartli ozod qilish to‘g‘risida taqdimnoma kiritish vakolati jazoni ijro etish organidan, yangi tashkil etiladigan Insonparvarlik komissiyasiga o‘tkazilishini ta’kidladi. Buni esa inson huquqlarini himoya qilish tizimidagi navbatdagi katta yutuq deyish mumkin.

Ulug‘bek Muhammadiyev, Oliy Majlisnig Inson huquqlari bo‘yicha vakili