«Мана, бир йил ўтди, энди халқнинг олдига чиқиш керак». Сенат раиси Танзила Норбоева депутатларга топшириқ берди

Фуқаролар ўз мурожаатини ижтимоий тармоқ орқали йўллаш урфга айланиб боряпти. Бу ҳақда Олий Мажлис Сенатининг ўн биринчи ялпи мажлисида сенат раиси Танзила Норбоева айтиб ўтди.

Танзила Норбоеванинг маълум қилишича, Олий Мажлис Сенатининг маҳаллий кенгаш депутати фаолиятидан миннатдорлик хатлари билан бирга ўз депутатини танимаслиги, маҳаллага бирон марта келмаганлиги, мурожаат этса, умуман жавоб бермаслиги каби ҳолатлар бўйича ҳам мурожаатлар келмоқда.

«Бу каби ҳолатлардан шундай хулоса қилиш мумкинки, айрим депутатлар халқнинг вакили сифатидаги вазифасини тўлиқ бажара олмаяпти. Халқнинг ўзи бир кун келиб депутатга ‘сен бизга нима иш қилиб бердинг, нима фойданг тегди?’, деган саволлар бериб, қайта сайлансин деган талабни ҳам қўйиши мумкин. Шундай экан, мана бир йил ўтди, оз бўлса-да оқу қорани таниб олдингиз, энди халқнинг олдига чиқиш керак. Чиққанда ҳам ҳар куни чиқиш керак. Асосий мақсадингиз халқнинг розилигини олиш эканлигини унутмаслигингиз керак», — деди Сенат раиси.

Норбоева хонимнинг алоҳида таъкидлашича, 2021 йилдан ҳар бир депутат

• ўзи сайланган ҳудуддаги сайловчилар билан мулоқотни қатъий йўлга қўйиши;
• муаммоларни ҳал этишга кўмаклашиши;
• асоссиз масалани кўтарган фуқарога қонуний тушунтириш бера олиши зарур.

«Айрим фуқаролар қонунни тушунмагани боис асоссиз мурожаатлар қилишади. Депутат шуларни эринмасдан аҳолига тушунтириб бериши керак. Мана шу ишлар қилинмаяпти ва шунинг учун ижтимоий тармоқларда салбий фикрлар уйғонмоқда. Фуқаро ўз мурожаатини ижтимоий тармоқ орқали йўллаш урфга айланиб боряпти. Бундай бўлиши керак эмас. Шунда у ердаги депутат, сектор раҳбари ёки ҳоким қани, деган савол туғилади. Нима учун фуқаролар ижтимоий тармоқ орқали Президентга ёки бошқа мутасаддиларга мурожаат қилишади? Демак, шу ердаги мутасаддиларнинг иши қониқарли эмас. Одамлар шундай қилишга мажбур бўляпти», — дейди Танзила Норбоева.Эслатиб ўтамиз, видеоконференсалоқа шаклида бўлиб ўтадиган ялпи мажлисда бир қатор масалалар кўриб чиқилиши режалаштирилган. Ўзбекистон Президенти Шавкат Мирзиёевнинг Олий Мажлисга йўллаган Мурожаатномасида белгиланган вазифалар шулар жумласидандир.

Бундан ташқари, «Ўзбекистон Республикасининг Конституциясига ўзгартиришлар киритиш тўғрисида»ги, «Ўзбекистон Республикасининг Шаҳарсозлик кодексини тасдиқлаш ҳақида»ги, «Маданий фаолият ва маданият ташкилотлари тўғрисида»ги Ўзбекистон Республикаси қонунлари муҳокама қилиниши назарда тутилган.

Ўзбекистонда сўнгги парламент сайловлари 2019 йил декабрда бўлиб ўтган эди.