АҚШ вице-президенти Майк Пенс Оқ уй раҳбари Дональд Трампга сайловчилар ҳайъати аъзоларининг овоз бериш натижаларини бекор қилиш ҳуқуқига эга эмаслигини маълум қилди. Вице-президентнинг позицияси ҳақида The New York Times (NYT) ўз манбаларига таяниб ёзди. Трамп газета хабарини ёлғон деб атади. Вице-президентнинг ўзи эса NYT мақоласини изоҳлаганича йўқ. Бу ҳақда «Коммерсантъ» хабар бермоқда.
NYT маълумотларига кўра, президент билан биргаликда тушлик қилиш вақтида Пенс ўзининг овоз бериш якунларига таъсир ўтказиш имкониятлари юзасидан шубҳа билдирган. Бундан бир кун аввал Трамп Twitter’да вице-президентда сайловчилар ҳайъатининг овоз бериш натижаларини ҳақиқий эмас деб топиш учун ваколат борлиги ҳақида ёзганди.
«New York Times’нинг вице-президент, гўёки, бугун мен билан суҳбат чоғида айтган гаплари ҳақидаги репортажи — бу ёлғон хабар. У ҳеч қачон бунақа гап айтгани йўқ. Вице-президент ва мен вице-президент чора кўриш учун ваколатларга эга деган фикрга тўлиқ қўшиламиз», — дея мақолага муносабат билдирди Дональд Трамп.
Оқ уй раҳбари қўшимча қилишича, АҚШ Конституциясига мувофиқ, вице-президент бир қатор имкониятларга эга. «У натижалар сертификациясини бекор қилиши ёки ўзгартириш ва сертификатлаш учун уларни штатларга қайтариб юбориши мумкин. У, шунингдек, ноқонуний ва порахўрлик орқали қўлга киритилган натижалар сертификациясини бекор қилиб, уларни ‘битта штат — битта овоз’ ҳисобида овоз бериш учун Вакиллар палатасига юбориши мумкин», — дея қўшиб қўйди у.
6 январь куни АҚШ Конгрессининг иккала палатаси қўшма мажлисида сайловчилар ҳайъатидаги овоз бериш натижалари тасдиқланади. Вице-президент Сенат раиси сифатида сайлов якунларини расман сертификатлайди (тасдиқлайди). Мажлис Тошкент вақти билан соат 23:00 да бошланади.
Маълумот учун, 2021 йил 20 январь куни сайланган давлат раҳбари демократ Жо Байден ўз лавозимига киришиши керак. Декабрь ўрталарида сайловчилар ҳайъати Трампнинг сайловдаги бош рақибини Американинг 46-президенти деб эълон қилди. Байден сайловчилар ҳайъати аъзоларининг 300 дан ортиқ овозини, амалдаги президент эса 230 дан зиёдроқ овозни қўлга киритди. Байденнинг инаугурацияси анъанага кўра Вашингтонда бўлиб ўтади.
Изоҳ (0)