Навальнийни заҳарлаганларнинг бошқа фаоллар ва сиёсатчилар ўлимига ҳам эҳтимолий алоқадорлигини журналистлар текширмоқда

Bellingcat журналистик тадқиқот сайти сиёсатчи Алексей Навальнийни заҳарлаган деб тахмин этилаётган Россия Федерал хавфсизлик хизмати (ФХХ) ходимларининг журналист Тимур Куашев ва сиёсатчи Никита Исаевнинг ўлимларига, шунингдек, сиёсатчи кичик Владимир Кара-Мурзанинг заҳарланишига эҳтимолий алоқадорлиги юзасидан текширув олиб бормоқда, деб ёзади Meduza. Буни Bellingcat журналисти Христо Грозев тасдиқлаган.

«Уларнинг барчасида муайян элементлар мос тушади, булар эса қўшимча текширувни талаб этади. Лекин мен ҳозирча ҳеч қанақа исмларни айтмоқчи эмасман. Айниқса марҳумларнинг исмларини, чунки агар биз бу ФХХ гуруҳи билан боғлиқ бўлиши мумкин, десак, уларнинг оилалари учун бу машъум кунга айланиши мумкин. Шундай экан, 100 фоиз далил-исботга эга бўлмасдан туриб, бундай дейишга тайёр эмасман. Аммо бу ўхшашликларни биз жуда батафсил қилиб ўрганамиз», — деди Грозев.

Унинг сўзларига кўра, бир гуруҳ эҳтимолий ФХХ ходимлари Шимолий Кавказдаги операцияда иштирок этгани, унинг доирасида маҳаллий сиёсатчилар ва журналистларни ўлдирганлигини тахмин қилиш имконини берувчи далиллар аллақачон бор.

«Шуни айтмоқчиманки, бизда муайян бир чегарани топиш имконини берувчи алгоритм бор, ана шу чизиқдан ўтган ҳолатни шунчаки тасодиф деб айтиб бўлмайди. Аммо бу алгоритм сафарларга асосланган, у камида учта шундай сафарни талаб этади. Сиз айтган одамларнинг баъзиларида (Куашев, Исаев, Кара-Мурза) аллақачон учтадан сафар бор», — деди Грозев.

Христо Грозев — Bellingcat The Insider, CNN ва Der Spiegel билан биргаликда олиб борган Навальнийнинг заҳарланиши ҳақидаги тадқиқотнинг асосий муаллифи. Тадқиқотчилар Навальнийни ФХХ тезкор ходимлари гуруҳи «Новичок» билан заҳарлаган, деган хулосага келди. Уларнинг шахсларини тадқиқот муаллифлари авиайўловчилар маълумотлар базаси таҳлили ва уяли телефонлар биллинги ёрдамида аниқлади.

31 декабрь куни ФХХ ходимлари деб тахмин этилаётган ўн кишининг 500 дан ортиқ сафарлари ҳақидаги ахборот эълон қилинди, уларнинг саккиз нафари Навальнийнинг заҳарланиши ҳақидаги тадқиқотда тилга олинган эди.

1 январь куни Грозев ФХХ гуруҳининг эҳтимолий иштирокчиларининг у ёқдан бу ёққа ўтиб юришлари ҳақидаги маълумот уларнинг яна учта заҳарланиш ва иккита суиқасдга алоқадор бўлиши мумкин деб тахмин қилиш учун асос бўлишини айтди. Грозев бошқа тафсилотларни келтирмади.

Грозев томонидан эълон қилинган сафарлар рўйхатида журналист Тимур Куашев, шунингдек, «Садвал» лезгин халқ ҳаракати етакчиси Руслан Магомедраҳимов ва чечен айирмачилари етакчиси Доку Умаровнинг ўлими вақти ва жойи билан боғлиқ ўхшашликларни топди.