Ўзбекистонлик 28 ёшли аёл Туркиянинг Измир шаҳри Каршияк туманида жойлашган кўп қаватли бинонинг 10-қаватидан сакраб, вафот этгани тўғрисида хабар берилганди. Ўзбекистоннинг Истанбул шаҳридаги Бош консулхонаси 2 январь куни Ўзбекистон фуқаросининг вафот этгани тўғрисида ОАВда эълон қилинган маълумотларни тасдиқлади, деб хабар беради ТИВ матбуот хизмати.
Маълум қилинишича, ҳуқуқни муҳофаза қилувчи идоралар Ўзбекистон фуқаросининг ўлими бўйича тергов жараёнини бошлаган.
Бош консулхона маълумотларига кўра, 2021 йил 1 январь куни Истанбул шаҳрида 1974 йил 11 июнда туғилган яна бир Ўзбекистон фуқароси юрак етишмовчилигидан вафот этган.
«Бош консулхона юқоридаги ҳолатларни назоратга олиб, Туркиянинг ваколатли идоралари билан алоқада бўлиб турибди. Вафот этганларнинг жасадларини Ўзбекистонга дафн этиш учун юборишни ташкил қилишда марҳумларнинг яқинларига консуллик ва ҳуқуқий ёрдам кўрсатилди», — дейилади вазирлик хабарида.
Эслатиб ўтамиз, 2020 йилнинг декабрь ойида Туркияда 31 ёшли ўзбекистонлик тиланчи томонидан пичоқлаб ўлдирилгани ҳақида хабар берилганди. 12 декабрь куни Туркияда яна бир ўзбекистонлик қотиллик қурбони бўлди. Истанбулнинг Чаталжа туманида юзага келган ўзаро жанжал оқибатида Ўзбекистон фуқароси, 1986 йилда туғилган Х.Х. жароҳат олиб, вафот этди.
Изоҳ (0)