Namangan viloyat IIB YHXB binosiga Yangi yil arafasida Namangan shahridagi 26-Mehribonlik uyining bir guruh tarbiyalanuvchilari taklif etildi. Bu haqda “Daryo” muxbiri Azizbek Abduvaliyev xabar bermoqda.
Bunga Mehribonlik uyi tarbiyalanuvchisi Islombek Mashrabovning YHXB boshlig‘i nomiga yozgan maktubi sabab bo‘ldi. U o‘z xatida kelgusida yo‘l harakati xavfsizligi xodimi bo‘lish orzusi haqida yozib, soha ishi bilan yaqinroq tanishish niyatida ekanini bildirgan.
Bolalar viloyat IIB YHXB binosiga olib kelinib, ekskursiya uyushtirildi. Ular navbatchilik qismida, boshqarma boshlig‘i xonasida bo‘lishdi, yo‘l-patrul mashinalarini boshqarishga urinishdi.
—Yo‘l harakati xavfsizligi idorasi men kutganimdan qiziqarliroq ekan. Kelgusida shu soha egasi bo‘lish niyatim yanada aniq bo‘ldi. Xatimni e’tiborsiz qoldirmay, bu yerga taklif etganlarga kattakon rahmat, — deydi Islombek Mashrabov.
Tadbir yakunida Mehribonlik uyi tarbiyalanuvchilari uchun bayram dasturxoni uyushtirildi, Qobobo va Qorqiz ularning xizmatida bo‘ldi.
Izoh (0)