Voz kechilgan hashamat: Millionlar o‘yinidagi eng kamtar millioner Ngolo Kante qanday hayot kechiradi?

Zamonaviy futbolning eng kamtar futbolchilaridan biri, “Chelsi” va Fransiya terma jamoasi yarim himoyachisi Ngolo Kantening qanday hayot kechirishi haqida hikoya qilib beramiz.

Kante qayerda yashaydi?

Kante maydonda haqiqiy jangchi va kurashlardan aslo qochmaydi. Ammo hayotda u juda kamtar va beozor yigit. Buni uning qanday va qayerda yashashidan ham bilish mumkindir. “Aristokratlar” yarim himoyachisining Angliyada shaxsiy uyi yo‘q, futbolchi Londonda klubi ijaraga olgan xonadonda istiqomat qiladi. Ngolo islom diniga e’tiqod qilgani bois, u uchun pul asosiy narsa emas va isrofgarchilikni umuman yoqtirmaydi. Shu sabab ishlab topgan millionlab mablag‘larini oila manfaatlari va xayriya ishlariga sarflaydi.

Futbolchining o‘zi aytganidek, u ko‘p vaqtni ijaraga olingan uyda emas, balki barcha sharoitlar mavjud bo‘lgan “Chelsi” bazasida o‘tkazadi.

Kante qanday mashinalarda yuradi?

Kante uchun avtomobil hashamatli emas, balki transport vositasidir. Haftasiga qariyb 300 ming funt (290 ming) maoshi orqali Kante dunyodagi istalgan mashinani sotib olishga qurbi yetadi, ammo fransiyalik yigit shunchalik kamtarinki, unda kichkinagina Mini Cooper’dan boshqa mashina yo‘q. Ma’lumotlarga ko‘ra bu mashina ham unga noma’lum muxlis tomonidan sovg‘a qilingan.

“Lester” bilan Premyer Ligada g‘alaba qozonganida esa klub xo‘jayini jamoaning har bir futbolchisiga BMW sovg‘a qiladi, ammo Kante bu mashinani haydashdan bosh tortadi va uni xayriya ishlari uchun berib yuboradi.

Nima ham deyish mumkin? Shunchaki qoyil qolmasdan boshqa iloj yo‘q. Ehtimol, u futbol olamidagi eng kamtarin o‘yinchidir.

Kantening do‘stlari kim?

Kante juda sirli, yopiq inson bo‘lib, yuqorida ta’kidlanganidek, biron bir joyga sayr qilishdan ko‘ra, mashq qilishni afzal biladi. Shunga qaramay, uning bir qancha do‘stlari bor.

“Chelsi”da u asosan Sezar Aspilikueta va Eden Azar (“Real”ga ketmasidan ilgari) bilan ko‘p muloqot qilgan.

Shuningdek, u Mishi Batshuayi bilan ham yaxshi munosabatlarga ega.

Futboldan tashqari qiziqishlar

Kante ajoyib inson va uning qiziqishlari ham shunga monanddir. Ngolo professional faoliyatini boshlashidan oldin hisobchilik diplomini olishga ulgurgan. Shunday ekan, futbolchilik faoliyati yakunlangach, Kante yangi mashg‘ulot topish masalasida bosh qotirmasa ham bo‘ladi.

Sevimli mashg‘ulotlar haqida gap ketganda esa yarim himoyachi bo‘sh vaqtlarida jamoadoshlari bilan bilyard o‘ynashni yaxshi ko‘radi.