Yil sarhisobi: O‘zbekiston Prezidenti Shavkat Mirziyoyevning 2020-yilda borgan manzillari (foto)

O‘zbekiston mustaqilligining 29 yilligi arafasida bir guruh fuqarolar O‘zbekiston Prezidenti tomonidan faxriy unvonlar, orden va medallar bilan taqdirlangan edi. 28-dekabr kuni Ko‘ksaroyda mukofotlarni topshirish marosimida davlat rahbari o‘z nutqida o‘tayotgan pandemiya yili haqidagi fikrlari bilan ham o‘rtoqlashdi. Jumladan, Prezident “El-yurtimiz bu muammolar qarshisida sarosimaga tushib qolgani yo‘q. Aksincha, qiyinchiliklar bizni yanada birlashtirdi, bir-birimizga mehrimiz ortdi. Murakkab vaziyatga qaramasdan, ko‘pni ko‘rgan, azm-u shijoatli xalqimizning fidokorona mehnati bilan bu sinovlarni mardona yengib o‘tyapmiz. Baraka hamjihatlikda, degan gap hayotimizda yana bir bor o‘z tasdig‘ini topdi. Pandemiya va global inqiroz oqibatlarini kamaytirish bo‘yicha ko‘rayotgan chora-tadbirlarimiz o‘z samarasini beryapti”, — deya ta’kidladi. 

Mamlakat yetakchisi mana shunday murakkab bir davrda ham barcha sohalar bilan keng ko‘lamli ishlar olib borish, imkoni boricha eng zaruriy yo‘nalishlar faoliyati bilan shaxsan tanishishga intildi. “Daryo” 2020-yilda Shavkat Mirziyoyev tashrif bilan borgan manzillarni birma-bir yodga oladi.

Biz bugungi natijalarga erishish uchun pandemiya sharoitida — g‘oyat murakkab bir vaziyatda ish olib bordik. Buning uchun 2-3 karra ko‘proq mehnat qilishga, izlanish, yangi imkoniyat va resurslarni qidirib topishga to‘g‘ri keldi. Avvalo, fidoyi shifokorlarimiz o‘z jonini garovga qo‘yib, xalqimiz sog‘lig‘ini asrash uchun beqiyos jasorat va matonat ko‘rsatdilar. Bu borada Qurolli Kuchlar, Milliy gvardiya, Ichki ishlar, Favqulodda vaziyatlar vazirligi mard va jasur xodimlarining xizmatlarini alohida qadrlaymiz. Ayni vaqtda bunyodkor quruvchilar, saxovatli tadbirkorlar, mahalla faollari, muhtaram nuroniylarimiz, navqiron yoshlarimiz, ilm-fan, madaniyat va sport sohasi vakillari el-yurtimizga haqiqiy tayanch va suyanch bo‘lib maydonga chiqdilar. Har qanday sinovni birdamlik bilan yengib o‘tadigan xalqimiz mana shunday og‘ir kunlarda qudratli kuchga aylandi. Fursatdan foydalanib, sabr-matonatli, zahmatkash, olijanob va fidoyi xalqimizga, uning buyuk qahramonligi uchun yana bir bor bosh egib, ta’zim qilaman.Shavkat Mirziyoyev, O‘zbekiston Prezidenti