“Daryo”da “Samarqandda mahallaga suv toshiradigan nobop ariq bor. Da’vosi — ariqdagi beton-qurilmani buzish. Uni sentabrda hatto Erkinjon Turdimov buzishga tayyor edi, lekin hali ham buzilgani yo‘q” nomli maqola e’lon qilingan edi. MIB Samarqand viloyat boshqarmasi mazkur maqolaga munosabat bildirdi.
Aniqlanishicha, fuqarolik ishlari bo‘yicha Samarqand shahar sudida da’vogar Bahrom Davronovning “So‘zangaron” mahallasi, X.Salimzoda ko‘chasi, 4-uyda yashovchi qarzdor Suhrob Muhammadiyevga nisbatan da’vo arizasi yuzasidan 2020-yilning 13-yanvar kuni hal qiluv qarori chiqarilgan. Unga ko‘ra, qarzdor Muhammadiyevning zimmasiga “Shaar tashlama” arig‘ining tabiiy o‘zanida qurilgan beton qurilmasini o‘z hisobidan buzdirish va ariqning o‘zanini tabiiy yo‘nalishiga qaytarish majburiyati yuklatilgan.
Sud qarori asosida Majburiy ijro byurosi Samarqand shahar bo‘limi tomonidan ijro ishi yuritilib, “Sud hujjatlari va boshqa organlar hujjatlarini ijro etish to‘g‘risida”gi qonunning 23-moddasiga asosan qarzdorga ijro hujjatini ixtiyoriy bajarish uchun 15 kunlik muddat berilgan.
Qarzdor tomonidan uzrsiz sabablarga ko‘ra, ixtiyoriy ravishda ijro hujjatining ijrosi ta’minlanmaganligi sababli mazkur ijro hujjati yuzasidan bir necha marotaba majburiy ijro harakatlari tayinlangan. Biroq qarzdor Suhrob Muhammadiyev va uning oila a’zolari tomonidan ijro harakatlariga keskin qarshilik ko‘rsatilganligi sababli ijro hujjatining ijrosini ta’minlash imkoni bo‘lmagan va ijro harakatlari keyinga qoldirilgan.
Shuningdek, qarzdor Suhrob Muhammadiyev davlat ijrochisi tomonidan bir necha marotaba ogohlantirishlarga qaramasdan, ijro hujjati talablarini bajarmaganligi sababli unga nisbatan Ma’muriy javobgarlik to‘g‘risidagi kodeksning 1981–moddasiga (Qarzdorning ijro hujjatini ijro etmasligi) asosan bazaviy hisoblash miqdorining besh baravari, ya’ni 1 million 115 ming so‘m miqdorida ma’muriy jarima qo‘llanilgan.
2020-yilning 12-mart kuni FIB (Fuqarolik ishlari bo‘yicha) Samarqand shahar sudi mazkur ijro hujjatini vaqtincha to‘xtatgan. FIB Samarqand shahar sudining 2020-yil 26-maydagi ajrimi bilan ijro hujjati bo‘yicha ijro harakatlari qayta tiklangan. 2020-yilning 13-oktabr kuni ushbu ijro hujjati bo‘yicha majburiy ijro harakatlari tayinlanib, ijro harakatlari davomida “Shaar tashlama” arig‘ining tabiiy o‘zanida qurilgan beton qurilmasining bir qismi buzilgan.
Shu bilan birga, ijro hujjatida “Shaar tashlama” arig‘ini tabiiy yo‘nalishiga qaytarish lozimligi ko‘rsatilgan bo‘lsa-da, ariqning o‘zanida qurilgan beton qurilmasini buzish chiziqlari va o‘lchamlari, ariqning kengligi ko‘rsatilmaganligi sababli mazkur ijro hujjat bo‘yicha xulosa berish uchun qonunning 20-moddasi tartibida mutaxassis tayinlangan va ijrosini ta’minlash Samarqand shahar hokimligi Obodonlashtirish boshqarmasining xodimlari zimmasiga yuklatilgan.
Samarqand shahar hokimligi Obodonlashtirish boshqarmasining 2020-yilning 5-dekabrdagi xatida “Shaar tashlama” arig‘i ichidagi beton parchalari olib tashlanib, Samarqand shahar, X.Salimzoda ko‘chasida yashovchi fuqarolar tomonidan hashar yo‘li bilan ariq to‘liq qazilib, o‘zan kengaytirilganida, ariqning suv o‘tkazish qobiliyati tiklanganligi va o‘rtacha 1,0—1,5 kub metr/sekund miqdorida suv o‘tkazilishi mumkinligi ko‘rsatilgan.
Majburiy ijro byurosi Samarqand shahar bo‘limi xodimlari tomonidan 2020-yil 22-dekabr kuni obodonlashtirish boshqarmasi mutaxassislari, “So‘zangaron” MFY raisi, IIB xodimlari, xolislar va mahalla faollari ishtirokida maxsus texnika yordamida “Shaar tashlama” arig‘ining tabiiy o‘zanida qurilgan beton to‘siq olib tashlanib, ariqning suv o‘tkazish qobiliyati qayta tiklangan va bu haqda tegishli tartibda dalolatnoma rasmiylashtirilgan.
“Qish va bahor oylari seryog‘in kelishi kutilmoqda. Bu esa turli ko‘ngilsiz oqibatlarga olib kelishi mumkin. Suv yo‘llari sun’iy to‘sib qo‘yilishi natijasida to‘plangan suv aholi xonadonlariga va hovlilariga kirib, ko‘chalarni yaroqsiz ahvolga keltiradi. Shu bois, fuqarolardan xonadonlari yaqinidan o‘tgan kanal, ariqlar va boshqa suv yo‘llarini to‘smaslikni, ariqlar ustida va muhofaza zonasida turli noqonuniy qurilishlar qurmaslikni, ariqlarni vaqtida tozalab turishlarini iltimos qilamiz”, — deyilgan MIB Samarqand viloyati boshqarmasi axborot xizmati ma’lumotida.
Izoh (0)