«Дарё»да «Самарқандда маҳаллага сув тоширадиган нобоп ариқ бор. Даъвоси — ариқдаги бетон-қурилмани бузиш. Уни сентябрда ҳатто Эркинжон Турдимов бузишга тайёр эди, лекин ҳали ҳам бузилгани йўқ» номли мақола эълон қилинган эди. МИБ Самарқанд вилоят бошқармаси мазкур мақолага муносабат билдирди.
Аниқланишича, фуқаролик ишлари бўйича Самарқанд шаҳар судида даъвогар Баҳром Давроновнинг «Сўзангарон» маҳалласи, Х.Салимзода кўчаси, 4-уйда яшовчи қарздор Суҳроб Муҳаммадиевга нисбатан даъво аризаси юзасидан 2020 йилнинг 13 январь куни ҳал қилув қарори чиқарилган. Унга кўра, қарздор Муҳаммадиевнинг зиммасига «Шаар ташлама» ариғининг табиий ўзанида қурилган бетон қурилмасини ўз ҳисобидан буздириш ва ариқнинг ўзанини табиий йўналишига қайтариш мажбурияти юклатилган.
Суд қарори асосида Мажбурий ижро бюроси Самарқанд шаҳар бўлими томонидан ижро иши юритилиб, «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 23-моддасига асосан қарздорга ижро ҳужжатини ихтиёрий бажариш учун 15 кунлик муддат берилган.
Қарздор томонидан узрсиз сабабларга кўра, ихтиёрий равишда ижро ҳужжатининг ижроси таъминланмаганлиги сабабли мазкур ижро ҳужжати юзасидан бир неча маротаба мажбурий ижро ҳаракатлари тайинланган. Бироқ қарздор Суҳроб Муҳаммадиев ва унинг оила аъзолари томонидан ижро ҳаракатларига кескин қаршилик кўрсатилганлиги сабабли ижро ҳужжатининг ижросини таъминлаш имкони бўлмаган ва ижро ҳаракатлари кейинга қолдирилган.
Шунингдек, қарздор Суҳроб Муҳаммадиев давлат ижрочиси томонидан бир неча маротаба огоҳлантиришларга қарамасдан, ижро ҳужжати талабларини бажармаганлиги сабабли унга нисбатан Маъмурий жавобгарлик тўғрисидаги кодекснинг 1981–моддасига (Қарздорнинг ижро ҳужжатини ижро этмаслиги) асосан базавий ҳисоблаш миқдорининг беш баравари, яъни 1 миллион 115 минг сўм миқдорида маъмурий жарима қўлланилган.
2020 йилнинг 12 март куни ФИБ (Фуқаролик ишлари бўйича) Самарқанд шаҳар суди мазкур ижро ҳужжатини вақтинча тўхтатган. ФИБ Самарқанд шаҳар судининг 2020 йил 26 майдаги ажрими билан ижро ҳужжати бўйича ижро ҳаракатлари қайта тикланган. 2020 йилнинг 13 октябрь куни ушбу ижро ҳужжати бўйича мажбурий ижро ҳаракатлари тайинланиб, ижро ҳаракатлари давомида «Шаар ташлама» ариғининг табиий ўзанида қурилган бетон қурилмасининг бир қисми бузилган.
Шу билан бирга, ижро ҳужжатида «Шаар ташлама» ариғини табиий йўналишига қайтариш лозимлиги кўрсатилган бўлса-да, ариқнинг ўзанида қурилган бетон қурилмасини бузиш чизиқлари ва ўлчамлари, ариқнинг кенглиги кўрсатилмаганлиги сабабли мазкур ижро ҳужжат бўйича хулоса бериш учун қонуннинг 20-моддаси тартибида мутахассис тайинланган ва ижросини таъминлаш Самарқанд шаҳар ҳокимлиги Ободонлаштириш бошқармасининг ходимлари зиммасига юклатилган.
Самарқанд шаҳар ҳокимлиги Ободонлаштириш бошқармасининг 2020 йилнинг 5 декабрдаги хатида «Шаар ташлама» ариғи ичидаги бетон парчалари олиб ташланиб, Самарқанд шаҳар, Х.Салимзода кўчасида яшовчи фуқаролар томонидан ҳашар йўли билан ариқ тўлиқ қазилиб, ўзан кенгайтирилганида, ариқнинг сув ўтказиш қобилияти тикланганлиги ва ўртача 1,0—1,5 куб метр/секунд миқдорида сув ўтказилиши мумкинлиги кўрсатилган.
Мажбурий ижро бюроси Самарқанд шаҳар бўлими ходимлари томонидан 2020 йил 22 декабрь куни ободонлаштириш бошқармаси мутахассислари, «Сўзангарон» МФЙ раиси, ИИБ ходимлари, холислар ва маҳалла фаоллари иштирокида махсус техника ёрдамида «Шаар ташлама» ариғининг табиий ўзанида қурилган бетон тўсиқ олиб ташланиб, ариқнинг сув ўтказиш қобилияти қайта тикланган ва бу ҳақда тегишли тартибда далолатнома расмийлаштирилган.
«Қиш ва баҳор ойлари серёғин келиши кутилмоқда. Бу эса турли кўнгилсиз оқибатларга олиб келиши мумкин. Сув йўллари сунъий тўсиб қўйилиши натижасида тўпланган сув аҳоли хонадонларига ва ҳовлиларига кириб, кўчаларни яроқсиз аҳволга келтиради. Шу боис, фуқаролардан хонадонлари яқинидан ўтган канал, ариқлар ва бошқа сув йўлларини тўсмасликни, ариқлар устида ва муҳофаза зонасида турли ноқонуний қурилишлар қурмасликни, ариқларни вақтида тозалаб туришларини илтимос қиламиз», — дейилган МИБ Самарқанд вилояти бошқармаси ахборот хизмати маълумотида.
Изоҳ (0)