Дубай амирлиги бир йил ичида аҳолисининг 70 фоизини COVID-19’га қарши эмлашни режалаштирмоқда

Дубай амирлиги расмийлари 2021 йил охирига қадар Pfizer ва BioNTech вакцинаси билан аҳолининг 70 фоизини коронавирусга қарши эмлашни кўзламоқда, деб хабар қилмоқда Daily Star’га таяниб «Интерфакс».

Қайд этилишича, Дубай аҳолиси ва фуқаролари учун эмлаш бепул амалга оширилади.

Маълум қилинишича, Дубай ўтган ҳафтада аҳолини коронавирусга қарши эмлашни бошлаган. 60 ёш ва ундан катта ёшдаги одамлар, сурункали касалликларга чалинган одамлар, ногиронлар ва бевосита беморлар билан ишлайдиган кишилар биринчи навбатда эмланади. Апрель ойидан бошлаб қолганларнинг навбати келади.

Абу-Даби амирлиги оммавий эмлаш учун Хитойнинг Sinopharm компанияси томонидан ишлаб чиқилган вакцинани танлади, Дубай эса бу танловда Саудия Арабистонидан ўрнак олиб, Pfizer вакцинасини билан аҳолини эмламоқчи. Бошқа амирликлар Pfizer вакцинасидан фавқулодда фойдаланишга ҳали рухсат бермаган. Ҳар бир амирлик ўз эмлаш дастурини ишлаб чиқмоқда.

Жонс Ҳопкинс университетининг 29 декабрь куни берган маълумотларига кўра, БААда пандемия бошидан буён жами 204 369 нафар коронавирусга чалинганлар аниқланган. Беморларнинг 660 нафари вафот этган.

Аввалроқ Абу-Даби амирлиги ўзбекистонликларни 2 ҳафталик мажбурий карантинни ўташдан озод қилгани ҳақида хабар берилганди.