Eronda 29-dekabr kuni koronavirusga qarshi vaksinaning klinik sinovlari boshlandi, deb xabar berdi Tasnim News.
Eronlik mutaxassislar tomonidan ishlab chiqarilgan vaksina bilan dastlabki ikkita ko‘ngilli, jumladan, vaksinani ishlab chiqarishga mas’ul bo‘lgan Imom Xumayniy buyruqlarini bajarish bo‘yicha shtab raisining qizi emlandi.
Tashkilot raisi Muhammad Mohberning xabar berishicha, “dushman va inqilobga qarshi ommaviy axborot vositalari tomonidan boshlangan tashviqot kampaniyasiga qaramay”, mamlakatning 60 ming fuqarosi vaksina sinovlarida ishtirok etish uchun ixtiyoriy ravishda qatnashgan. Uning ta’kidlashicha, aslida vaksinani sinab ko‘rish uchun turli jins va yoshdagi 56 kishi kerak edi.
Shu bilan birga, Mohberning ta’kidlashicha, vaksinani odamlarda sinovdan o‘tkazishda Eron Jahon sog‘liqni saqlash tashkiloti tomonidan tavsiya etilgan xavfsizlik choralariga rioya qiladi va shtab keyinchalik 1,5 million dozagacha vaksinani qabul qilib oladi.
Uning qo‘shimcha qilishicha, kelasi olti oy ichida Eron vaksina ishlab chiqarishni oyiga 12 million dozaga yetkazadi.
Jons Hopkins ma’lumotlariga ko‘ra, pandemiya boshlangandan beri Eronda 1,2 milliondan ortiq odamda koronavirus aniqlangan. Bemorlarning 54,8 mingdan ortig‘i vafot etgan, 960 mingdan ortig‘i sog‘aygan.
Avvalroq Qozog‘iston ko‘ngillilarni mahalliy vaksina bilan emlashni boshlagani, O‘zbekistonda 488 nafar ko‘ngilli koronavirusga qarshi emlangani hamda O‘zbekiston innovatsion rivojlanish vaziri Xitoy vaksinasi masalasida aholini xotirjamlikka chaqirgani haqida xabar berilgandi.
Izoh (0)