Yangi eksport bozorlariga chiqish O‘zbekiston hukumatining eng asosiy vazifalaridan biri bo‘lib qoladi, dedi Shavkat Mirziyoyev 29-dekabr kuni Oliy Majlisga yo‘llagan Murojaatnomasi davomida.
“Kelgusi yilda Jahon savdo tashkilotiga a’zolik masalasi hamda Yevropa Ittifoqi bilan keng qamrovli hamkorlik bo‘yicha ishlarni faollashtirish lozim”, — dedi Prezident. Ayni vaqtda, davlat rahbari GSP+ tizimi doirasidagi imtiyozlarni O‘zbekistonda samarali qo‘llash uchun alohida dastur ishlab chiqish kerakligini ta’kidladi.
O‘zbekiston yaqinda Yevroosiyo iqtisodiy ittifoqida kuzatuvchi maqomini oldi.
“Ushbu tashkilotga a’zo bo‘lgan davlatlar bozorlarida to‘laqonli ishtirok etish uchun milliy texnik tartibga solish me’yorlarini ularning talablariga moslashtirish bo‘yicha ishlarni jadallashtirish zarur”, — deya qayd etib o‘tdi davlat rahbari.
Prezidentning so‘zlariga ko‘ra, korxonalarga xomashyo sotib olish va eksportbop mahsulotlar ishlab chiqarish uchun Eksportni qo‘llab-quvvatlash jamg‘armasidan 100 million dollar ajratiladi.
Eksport qiluvchilarga chet elda savdo uylari va do‘konlar ochish hamda reklama xarajatlarining 50 foizi qoplab beriladi.
Umuman, hukumatga kelgusi yilda tovar va xizmatlar eksportini kamida 20 foizga oshirish vazifasi topshiriladi.
Mavzuga doir:
- O‘zbekistonda 2021-yilda avtomobil ishlab chiqaruvchilar soni ko‘paytiriladi, 73 ta aksiz solig‘i bekor qilinadi
- Shavkat Mirziyoyev: “Davlat ishtirokidagi korxonalar davlatning o‘ziga og‘ir yuk bo‘lyapti”
- O‘zbekistonda elektr energiyasi ulgurji bozori shakllantiriladi, suyultirilgan gaz importi uchun bojlar bekor qilinadi
- Shavkat Mirziyoyev 2021-yilni Yoshlarni qo‘llab-quvvatlash va aholi salomatligini mustahkamlash yili deb e’lon qildi
Izoh (0)