O‘zbekistonda 2021-yildan oziq-ovqat, neft va elektrotexnika kabi tarmoqlarda 73 ta aksiz solig‘i bekor qilinadi. Bu haqda Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida ma’lum qildi.
Bundan tashqari, zargarlik sohasida kelgusi yil 1-martdan boshlab kumushni birja orqali ishlab chiqaruvchilarga erkin sotish tartibi o‘rnatiladi.
“Avtomobil sanoatida sog‘lom raqobat muhitini rivojlantirish va korxonalarga teng sharoitlar yaratish orqali sohada ishlab chiqaruvchilar soni ko‘paytiriladi”, — dedi Prezident Shavkat Mirziyoyev.
Davlat rahbarining qayd etishicha, hozirgi kunda davlat xaridlarida atigi 4 foiz tadbirkor qatnashmoqda. Kelgusi yilda 24 ta yirik davlat korxonasiga davlat xaridi bo‘yicha ochiq-oshkora talablar joriy etiladi. Natijada mahalliy tadbirkorlar har yili kamida 10 trillion so‘mlik mahsulotlarini ushbu korxonalarga sotish imkoniyatiga ega bo‘ladi.
“Bundan buyon barcha davlat xaridlari jamoatchilik va Parlament nazoratida bo‘ladi”, — deya alohida qayd etdi Shavkat Mirziyoyev.
Mavzuga doir:
- Jizzax viloyati hokimining qiziga tegishli kompaniya ko‘chalarga gul ekish bo‘yicha 1,9 mlrd so‘mlik yana bir tenderni yutib olgani ma’lum bo‘ldi
- “Jizzaxcha tenderlar-2”. Bir necha yuz mlrd so‘mlik loyihalarni viloyat hokimi o‘rinbosarining qarindoshlari qo‘lga kiritgani ma’lum bo‘ldi
- Xorazm viloyati hokimi o‘rinbosarining ukasiga tegishli kompaniya tenderda 20 mlrd so‘mlik davlat buyurtmasini yutgani ma’lum bo‘ldi
Ayniqsa, neftgaz-kimyo, metallurgiya, mashinasozlik, elektrotexnika, farmatsevtika, qurilish materiallari, to‘qimachilik, charm-poyabzal, oziq-ovqat hamda “yashil iqtisodiyot” bilan bog‘liq sanoat tarmoqlari iqtisodiyotning “drayverlari”ga aylanishi uchun yetarli sharoit mavjud. “Bu tarmoqlarda xususiy sektorning tashabbuslari va yangi loyihalarini qo‘llab-quvvatlash hamda kooperatsiyani rivojlantirish bo‘yicha choralar ko‘rilishi lozim”, — dedi Prezident.
Shavkat Mirziyoyev hukumatga 2021-yil 1-aprelgacha istiqbolli sanoat klasterlari ro‘yxatini aniqlab, ularni jadal rivojlantirish uchun alohida dastur ishlab chiqish bo‘yicha topshiriq berdi.
Kelgusida esa “bojxona hududida qayta ishlash rejimi”da sanoat mahsulotlari ishlab chiqarishni ko‘paytirish zarurligi, shu bilan birga, investitsiya siyosatini yuritishda davlat ishtirokini pasaytirib, xususiy va to‘g‘ridan-to‘g‘ri investitsiyalar ulushini oshirish kerak, dedi davlat rahbari.
Geologiya sohasida 2020-yilda 21 ta kon va istiqbolli maydonlar ochiq auksion orqali investorlarga sotildi. 2021-yilda yana 50 ta kon va istiqbolli maydonlar mahalliy va chet ellik investorlarga ochiq mexanizmlar asosida sotiladi.
Umuman, kelgusi yilda O‘zbekiston o‘z oldiga 23 milliard dollarlik investitsiyalarni o‘zlashtirish vazifasini qo‘ygan. Buning natijasida 2021-yilning o‘zida 226 ta yirik sanoat va infratuzilma obyektlarini ishga tushirish ko‘zda tutilgan.
Mavzuga doir:
- Shavkat Mirziyoyev: “Davlat ishtirokidagi korxonalar davlatning o‘ziga og‘ir yuk bo‘lyapti”
- O‘zbekistonda elektr energiyasi ulgurji bozori shakllantiriladi, suyultirilgan gaz importi uchun bojlar bekor qilinadi
- Shavkat Mirziyoyev 2021-yilni Yoshlarni qo‘llab-quvvatlash va aholi salomatligini mustahkamlash yili deb e’lon qildi
Izoh (0)