Apple’ning namunasi “yuqumli” bo‘lib chiqqan ko‘rinadi, chunki yangi Xiaomi Mi 11 flagmani ham quvvatlantirgichsiz sotuvga chiqadi. Bu haqda kompaniya rahbari Ley Szyun o‘zining Weibo’dagi sahifasi orqali ma’lum qildi, deb xabar beradi Hi-Tech.Mail.ru.
Szyun obunachilari bilan kompaniya ekologiya haqida qayg‘urishi va shu sababli smartfon qutisidan alohida quvvatlantirgichni olib qo‘yishga qaror qilgani to‘g‘risidagi yangilik bilan bo‘lishgan. Avvalroq Apple ham aynan shu vaj bilan iPhone’lar jamlanmasini soddalashtirgan edi. Hozircha Xiaomi quvvatlantirgichni faqat flagmanlar qutisidan yoki barcha modellarnikidan olib tashlaydimi — bunisi noma’lum.
Qiziq jihati, bundan ikki oy oldin Xiaomi Apple’ning ushbu qarori ustidan kulgan edi. Mish-mishlarga ko‘ra, Samsung’ning yangi flagmanlari ham quvvatlantirgichsiz sotuvga chiqadi.
Xiaomi Mi 11 taqdimoti 28-dekabr kuni bo‘lib o‘tadi — u jamlanmasidan quvvatlantirish qurilmasi joy olmagan birinchi Xitoy smartfoniga aylanadi. Taxminlarga ko‘ra, bu 2021-yilning trendiga aylanadi.
Izoh (0)