Xitoyning Xiaomi kompaniyasi Apple o‘zining yangi iPhone’larini quvvatlantirish qurilmasisiz sotayotgani ustidan kuldi. Kompaniya o‘zining Twitter’dagi sahifasi orqali holatga o‘z munosabatini bildirgan.

Foto: GSMarena

14-oktabr kuni Xitoy brendining sahifasida Xiaomi Mi 10T Pro smartfonini qutidan olish tasvirlangan qisqa video e’lon qilingan. Rolikdan ko‘rish mumkinki, flagman qutisida quvvatlantirish adapteri o‘rin olgan. “Xavotirlanmang, biz qutidan hech narsani olib qo‘ymadik”, — deyiladi postda. Mazkur video iPhone 12 taqdim etilganidan bir kun o‘tib paydo bo‘lgan.

Virusli videoga aylangan post o‘n mingdan ortiq retvit va 30 ming layk yig‘gan. Xiaomi obunachilari rolikni hazil sifatida qabul qilib, turli izohlar qoldirmoqda. “Bu, yigitlar, sizlar atrof-muhit va kelajagimizga tom ma’noda tupurib qo‘yganingizni bildiradi. Bu sharmandalik”, — deb yozadi foydalanuvchilardan biri.

Eslatib o‘tamiz, Apple oktabrdan boshlab o‘zining yangi smartfonlari naushnik va quvvatlantirish qurilmasisiz sotishga qaror qilgan. Bu orqali kompaniya atrof-muhitga yetkaziladigan zararlarni kamaytirish niyatida.

Mavzuga doir: iPhone 12’da keramik oyna paydo bo‘ldi. Bu nima o‘zi?

Avvalroq Apple kompaniyasi yangi smartfonlarini Fransiyada naushniklar bilan sotishi to‘g‘risida xabar berilgandi.