O‘zbekistonning ayrim kodekslariga o‘zgartish va qo‘shimchalar kiritishni nazarda tutuvchi qonun Prezident tomonidan imzolandi, deya xabar bermoqda Adliya vazirligi.
Qonun bilan Ma’muriy javobgarlik to‘g‘risidagi kodeksga kiritilgan qo‘shimchaga ko‘ra shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish, shu jumladan ommaviy axborot vositalarida, telekommunikatsiya tarmoqlarida yoki internet tarmog‘ida tarqatish BHMning 50 baravari (11 million 150 ming so‘m) miqdorda jarima solishga sabab bo‘ladi.
Agar tarqatilgan yolg‘on axborot jamoat tartibiga yoki xavfsizligiga tahdid solsa uni tarqatgan shaxs BHMning 100 baravarigacha (22 million 300 ming so‘m) jarimaga tortilishi mumkin.
Jinoyat kodeksiga kiritilgan qo‘shimchaga ko‘ra, yolg‘on axborot tarqatganlik uchun ma’muriy javobgarlikka tortilgan shaxs ushbu huquqbuzarlikka takroran yo‘l qo‘ysa, BHMning 400 baravarigacha (89 million 200 ming so‘m) miqdorda jarimaga tortilishi yoki uch yilgacha ozodlikni cheklash jazosi bilan jazolanishi mumkin.
Avvalroq O‘zbekistonda tuhmat va haqorat uchun yengilroq jazolar belgilanishi kutilayotgani hamda O‘zbekistondagi saytlar va blogerlarga izohlarda qoldirilgan taqiqlangan ma’lumotlar bo‘yicha xabarnoma yuborilishi haqida xabar berilgandi.
Izoh (0)