O‘zbekistonda pornografiya va taqiqlangan kontentni tarqatganlik uchun solinadigan jarima miqdori oshiriladi
O‘zbekistonda pornografik ma’lumotlar va mahsulotlarni, zo‘ravonlik yoki shafqatsizlikni targ‘ib qiluvchi materiallarni tarqatganlik uchun solinadigan jarima miqdori oshiriladi. Ma’muriy javobgarlik to‘g‘risidagi kodeksga kiritilgan tegishli o‘zgartirishlar to‘g‘risidagi qonun Oliy Majlis Senati tomonidan 18-dekabrdagi yig‘ilishda ma’qullangan, deb xabar beradi “Gazeta.uz”.
Ma’muriy javobgarlik to‘g‘risidagi kodeksning 189-moddasiga kiritiladigan o‘zgartirishga ko‘ra, pornografiyani targ‘ib qiluvchi mahsulotni tarqatish, reklama qilish, namoyish etish maqsadida tayyorlash yoki O‘zbekiston hududiga olib kirish, xuddi shuningdek, uni tarqatish, reklama qilish, jumladan OAV, telekommunikatsiya yoki internetda (qo‘shimcha) namoyish etish fuqarolarning BHMning 50 dan 400 baravarigacha (hozirda 50 dan 100 baravarigacha), mansabdor shaxslar uchun esa — 100 dan 450 baravarigacha (hozirdan 100 dan 150 baravarigacha) jarima belgilanishiga sabab bo‘ladi. Shuningdek, pornografik mahsulotlarni tayyorlash, tarqatish, reklama qilish va namoyish qilish vositalari ham musodara qilinadi.
Ma’muriy javobgarlik to‘g‘risidagi kodeksning 189-1-moddasiga ko‘ra, zo‘ravonlikni yoki shafqatsizlikni targ‘ib qiluvchi mahsulotni, shuningdek uni tayyorlash, tarqatish, reklama qilish, jumladan OAV, telekommunikatsiya tarmoqlari yoki internetda (qo‘shimcha) namoyish etish, vositalarini musodara qilib, fuqarolarga bazaviy hisoblash miqdorining 50 baravaridan 400 baravarigacha (hozirda — 50 dan 100 baravarigacha), mansabdor shaxslarga esa 100 baravaridan 450 baravarigacha (hozirda — 100 dan 150 baravarigacha) miqdorda jarima solinishiga sabab bo‘ladi.
Qonunga oid tushuntirish xatida qayd etilishicha, telekommunikatsiya tarmoqlari va internetda pornografik ma’lumot va mahsulotlarni joylashtirish, zo‘ravonlik va shafqatsizlikni targ‘ib qilish qarshi o‘rnatilayotgan qonunchilik “shu kabi mahsulotlarning tarqalishini cheklashga yordam beradi”.
Ma’lumot uchun, 2020-yilda pornografik mahsulotlarni tayyorlash va tarqatish bo‘yicha 182 kishi ma’muriy javobgarlikka tortilgan.
Bundan tashqari, Ma’muriy javobgarlik to‘g‘risidagi kodeksning 25-moddasiga ham o‘zgartirish kiritilayotgan bo‘lib, unga ko‘ra, alohida qonunbuzarlik uchun o‘rnatilgan jarimalar miqdori 450 baravargacha (hozirda — 200 baravargacha) oshiriladi.
Avvalroq O‘zbekistonda tuhmat va haqorat uchun yengilroq jazolar belgilanishi kutilayotgani to‘g‘risida xabar berilgandi.
