Jizzax viloyati hokimi Ergash Soliyevning qizi Nargiza Soliyeva egalik qiladigan My Flower kompaniyasi 2020-yil iyunida Jizzax shahri markaziy ko‘chalariga gul va manzarali o‘simliklar ekish bo‘yicha tenderda ham g‘olib chiqqan.
Tenderda My Flower’dan tashqari Ishtixon Trans Servis kompaniyasi ham qatnashgan. G‘olib tender komissiyasining viloyat hokimi o‘rinbosari Akram Rahmonqulov raisligida 20-iyun kuni bo‘lib o‘tgan majlisida aniqlangan. Komissiya My Flower’ning 1,900 milliard so‘mlik (ekspertiza xulosasidagi qiymatdan 556 ming so‘mga arzonroq) taklifini “eng ma’qul va maqsadga muvofiq” deb topgan.
Avvalroq My Flower viloyatning “Yagona buyurtmachi xizmati” injiniring kompaniyasi tomonidan 2020-yil fevral va noyabr oylarida o‘tkazilgan, umumiy qiymati 1,98 milliard so‘mlik tanlovlarda ham g‘olib chiqqani haqida xabar berilgan edi. Qayd etish joiz, noyabrdagi tanlovda ham My Flower’ga Ishtixon Trans Servis kompaniyasi raqobatchi bo‘lgan.
Korrupsiyaga qarshi kurashish agentligi 26-dekabr kuni ta’sischilaridan biri hokimning qizi bo‘lgan kompaniya fevral va noyabrdagi tanlovlarni yutib olishi holatlarini “o‘z vakolatlari doirasida o‘rganishni boshlagani”ni, bu bo‘yicha Jizzax viloyatiga so‘rov yuborilganini ma’lum qilgan edi.
Izoh (0)