Eron islom inqilobi muhofizlari korpusi (IIMK)ning “Al-Quds” maxsus bo‘linmasi generali Qosim Sulaymoniyning o‘limi uchun qasos hali yakunlanmagan. Bu haqda “Al-Quds” komandiri o‘rinbosari general Muhammad Xejaziga tayanib “Interfaks” xabar berdi.
“Bu shunchaki yuzga tarsaki tortishdek gap edi, haqiqiy qasos hali oldinda”, — deydi general.
Uning fikricha, dastlabki javob Sulaymoniy va AQSh tomonidan o‘ldirilgan iroqlik shia ko‘ngilli jangchilarining rahbari Abu Mahdi al-Muhandisning dafn marosimlarining keng ko‘lamda o‘tkazilgani, shuningdek, Eron tomonidan Amerikaning Ayn-al-Asad harbiy bazasiga amalga oshirilgan raketa zarbalari hisoblanadi.
Xejazining ta’kidlashicha, Amerika kuchlarining mintaqadan quvib chiqarilishi Vashington uchun navbatdagi javobga aylanadi.
Eslatib o‘tamiz, Qosim Sulaymoniy 3-yanvar kuni AQSh havo kuchlari tomonidan Bag‘dod aeroportiga berilgan aviahujum oqibatida o‘ldirilgandi. Zarba AQSh prezidenti Donald Tramp farmoyishiga asosan berilgan.
U IIMKni terrorchilik tashkiloti deb hisoblagan va Qosim Sulaymoniyni mintaqada, xususan, Iroqda bo‘lib turgan amerikalik diplomatlar va harbiylarga hujum qilishni rejalashtirganlikda ayblagan. Eron esa unga javoban Iroqdagi Amerika bazasiga hujum qilgan. Buning oqibatida 100 dan ortiq amerikalik jarohatlangan.
Mavzuga doir: Eronda AQShga josuslik qilib, Sulaymoniy haqida ma’lumot berib turgan shaxs qatl etildi
Izoh (0)