Эрон ислом инқилоби муҳофизлари корпуси (ИИМК)нинг «Ал-Қудс» махсус бўлинмаси генерали Қосим Сулаймонийнинг ўлими учун қасос ҳали якунланмаган. Бу ҳақда «Ал-Қудс» командири ўринбосари генерал Муҳаммад Хежазига таяниб «Интерфакс» хабар берди.
«Бу шунчаки юзга тарсаки тортишдек гап эди, ҳақиқий қасос ҳали олдинда», — дейди генерал.
Унинг фикрича, дастлабки жавоб Сулаймоний ва АҚШ томонидан ўлдирилган ироқлик шиа кўнгилли жангчиларининг раҳбари Абу Маҳди ал-Муҳандиснинг дафн маросимларининг кенг кўламда ўтказилгани, шунингдек, Эрон томонидан Американинг Айн-ал-Асад ҳарбий базасига амалга оширилган ракета зарбалари ҳисобланади.
Хежазининг таъкидлашича, Америка кучларининг минтақадан қувиб чиқарилиши Вашингтон учун навбатдаги жавобга айланади.
Эслатиб ўтамиз, Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган.
У ИИМКни террорчилик ташкилоти деб ҳисоблаган ва Қосим Сулаймонийни минтақада, хусусан, Ироқда бўлиб турган америкалик дипломатлар ва ҳарбийларга ҳужум қилишни режалаштирганликда айблаган. Эрон эса унга жавобан Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланган.
Аввалроқ АҚШ ҳарбийлари Эрон томонидан ҳужум эҳтимоли юзасидан жанговар шайлик ҳолатига келтирилган эди.
Изоҳ (0)