Шавкат Мирзиёев сўнгги 11 ойда ёш оилалар ўртасида қанча ажрим қайд этилганини маълум қилди

2018—2020 йилларда Ўзбекистон бўйича 5 мингдан зиёд намунали ёш оилага арзон уй-жойлар қурилиб, қарийб 200 миллиард сўм миқдорида бошланғич бадал пуллари тўлаб берилди. Бу ҳақда 25 декабрь куни бўлиб ўтган Ўзбекистон ёшлари форумида маълум қилинди.

«Дарё» мухбири Миролим Исажоновнинг хабар беришича, давлат раҳбари ёш оилалар ўртасида кузатилаётган ажримлар ҳақида ҳам сўз юритди.

«Халқимиз азалдан оилани муқаддас билиб, уни доимо асраб-авайлаб келади. Оила қанчалик мустаҳкам бўлса, жамият ҳам шунчалик барқарор бўлади. Бир нарсани унутмаслигимиз лозим: хонадонларимиздаги тинчлик-тотувлик, аввало, оиладаги соғлом муҳитга, мустақил ҳаёт остонасида турган қизларимизни оилавий турмушга тайёрлаш билан бевосита боғлиқ. Афсуски, бу муҳим масалага лоқайдлик ва эътиборсизлигимиз натижасида жорий йилнинг ўтган 11 ойида ёш оилалар ўртасида 25 минг ажримлар қайд этилган. Бу салбий ҳолат барчамизни жиддий безовта қилиши ва қаттиқ ташвишга солиши керак албатта. Ахир ўзингиз ўйланг, агар 25 минг оиланинг ҳар бирида камида уч нафардан аъзоси бўлса, бу 100 минг нафар одам ҳаётининг барбод этилгани эмасми? Бунинг оқибатида қанчадан-қанча бегуноҳ болалар тирик етим бўлиб қолади, қанча инсонларнинг тақдири издан чиқиб, сарсон-саргардон бўлади? Нега мана шу оилаларни сақлаб қолиш учун маҳаллаларда ҳаракат қилмадик, ёшларга тўғри йўлни кўрсатмадик?», — деди Шавкат Мирзиёев.

Президент ўз нутқида маҳаллама-маҳалла юриш орқали 25 мингта оиланинг камида 5-10 мингтасини яраштириш мумкинлигини таъкидлади.

«Мен бугунги имкониятдан фойдаланиб, кенг жамоатчиликка, авваламбор, кўпни кўрган мўътабар нуронийларимизга, оқила ва меҳрибон оналаримизга мурожаат этмоқчиман. Бу оғриқли масалада бизга ёрдам беринглар, деб илтимос қиламан. Оилавий низоларнинг олдини олиш, ажримларни камайтириш борасида сиз, азиз ёшларимиз ҳам, ташаббус ва фаоллик кўрсатсангиз, мен барчангиздан чексиз миннатдор бўлар эдим.

Бугунги учрашувимизда «Нуроний» жамғармаси раиси Содиқжон Турдиев ва хотин-қизлар масалалари бўйича масъул раҳбар Гулнора Маъруфова ҳам қатнашяпти. Сизлар мазкур масалага оид ўзларингизни аниқ таклиф ва режаларингизни ёшларга етказиб, йигит-қизлар билан мулоқот қилсаларингиз ҳамда бу бўйича ўз тажрибаларингизни амалга ошириб, бефарқ бўлмасаларингиз, катта ижобий натижага эришамиз. 25 мингта оилани ҳам маҳаллама-маҳалла юриб, энг камида 5-10 мингтасини яраштиришимиз мумкин, мен бунга ишонаман. Агар бунга бефарқ бўлмасак, кўпроқ ёшларни эшитсак, қанчадан-қанча оилага бахт, нур олиб кирардик», — давлат раҳбари.