Buyuk Britaniya va Yevropa Ittifoqi Brexit’dan keyingi o‘zaro hamkorlik shartlarini kelishib oldi. Bu haqda Buyuk Britaniya bosh vaziri Boris Jonsonning ofisi ma’lum qildi, deb xabar bermoqda Meduza.
“Bu kelishuv Britaniya jamiyatiga 2016-yildagi referendumda va o‘tgan yildagi parlament saylovida berilgan va’dalarning barchasini amalga oshirishga imkon beradi”, — deyiladi Boris Jonsonning ofisi xabarida.
Boris Jonsonning o‘zi Twitter’ga yuqoriga ko‘tarilgan bosh barmoqlarini ko‘rsatib tushgan rasmini joylagan va “Kelishuv imzolandi”, deya izoh bergan.
The deal is done. pic.twitter.com/zzhvxOSeWz
— Boris Johnson (@BorisJohnson) December 24, 2020
Yevropa Ittifoqi va Buyuk Britaniya o‘rtasidagi kelishuv savdo, transport qatnovi, baliqchilik, energetika sohalaridagi kelgusi munosabatlarga, xavfsizlik sohasidagi hamkorlikka va boshqa sohalarga taalluqli.
Kelishuv 2021-yilning 1-yanvaridan kuchga kirishi kerak. Agar kelishuv imzolanmaganda 2021-yildan Buyuk Britaniya va Yevropa Ittifoqi erkin savdodan bojli va kvotali savdoga o‘tgan bo‘lardi, bu ikki tomon biznesi uchun ham yo‘qotishlarga olib kelgan bo‘ladi.
Buyuk Britaniya aholisi 2016-yilda o‘tkazilgan referendumda Yevropa Ittifoqidan chiqish uchun ovoz berdi. London va Bryussel chiqish bo‘yicha muzokaralarni boshladi, mazkur chiqish jarayoni 2017-yilning iyun oyida Brexit nomini oldi.
Bir necha marta ortga surilishlardan keyin Buyuk Britaniya 2020-yilning 1-fevralida Yevropa Ittifoqi tarkibidan chiqdi. Tomonlar yangi savdo kelishuvi imzolangunigacha Buyuk Britaniya uchun Yevropa Ittifoqining yagona savdo me’yorlari amal qilishiga kelishib olgandi.
Mazkur kelishuvni imzolash muddati 2020-yilning 31-dekabrida tugashi kerak edi.
Izoh (0)