Pandemiya sharoitida 2020-yilda sog‘liqni saqlash sohasida 50 nafar yangi milliarder paydo bo‘ldi, deb xabar bermoqda “RBK” Forbes’ga tayanib.
Qayd etilishicha, ularning boyligi vaksina ishlab chiqaruvchi yoki tibbiy qurilmalar yetkazib berish bilan shug‘ullanuvchi kompaniyalar aksiyalari qiymati oshgani hisobiga ortgan. Yangi milliarderlarning aksariyati virusning dastlabki o‘chog‘i paydo bo‘lgan Xitoyda yashaydi.
Forbes nashriga ko‘ra, pandemiya paytida boyib ketgan yangi milliarderlar orasidan quyidagilar o‘rin oldi:
Ugur Shahin — Germaniyaning BioNTech biotexnologik kompaniyasi bosh direktori. U Amerikaning Pfizer kompaniyasi bilan hamkorlikda samaradorligi 95 foizni tashkil etgani e’lon qilingan koronavirusga qarshi vaksina ishlab chiqdi. Yil boshidan buyon kompaniya aksiyalari 160 foizga o‘sdi. Nashrning yozishicha, shunday sharoitda BioNTech’ning 17 foiziga egalik qiluvchi Shahinning boyligi 4,2 milliard dollarga yetdi.
Mavzuga doir: Koronavirusga qarshi vaksina yaratgan BioNTech kompaniyasi rahbari dunyodagi eng boy 500 odam qatoriga kirdi
Yuan Lipin — Du Veyminning sobiq rafiqasi, Shenzhen Kangtai Biological Products kengashi raisi. Ajrashgandan so‘ng, u Xitoyning yetakchi vaksina ishlab chiqaruvchi kompaniyalaridan biri bo‘lgan kompaniyaning 24 foizini qo‘lga kiritgan. Xususan, AstraZeneca XXRdagi yagona vaksina ishlab chiqaruvchi hisoblanadi. Yil boshidan buyon Shenzhen Kangtai Biological Products aksiyalari 90 foizga, Yuanning boyligi esa 4,1 milliard dollarga o‘sgan.
Xu Kun — Xitoyning tibbiy qurilmalar, jumladan, nebulayzerlar, stetoskoplar va tonometrlar ishlab chiqaradigan Contec Medical Systems kompaniyasi rahbari. Xu Contec Medical Systems kompaniyasi aksiyalarining qariyb yarmiga egalik qiladi. Aksiyalar narxi IPO’dan so‘ng 150 foizga oshgan. Xu Kunning boyligi 3,9 milliard dollarga baholanmoqda.
Karl Xansen — Kanadaning sun’iy ong va mashinaviy o‘qitish texnologiyalari yordamida antitanalar qo‘llagan holda davolashning eng istiqbolli usullarini izlash bilan shug‘ullanuvchi AbCellera kompaniyasi rahbari. Forbes’ning baholashicha, Xansenning boyligi 2,9 milliard dollarga teng.
Timoti Sprinjer — Moderna asoschilaridan biri (2 milliard dollar). Uning kompaniyadagi ulushi 3,5 foizni tashkil etadi va taxminan, 1,6 milliard dollarga baholanadi. Bundan tashqari, Springer boshqa bir qator biotexnika kompaniyalariga faol ravishda sarmoya kiritib keladi.
Serjio Stevanato — Italiyaning Stevanato Group kompaniyasi rahbari. Kompaniya dunyoda shisha flakonlar ishlab chiqaruvchi ikkinchi yirik kompaniya hisoblanadi. Forbes ma’lumotlariga ko‘ra, kompaniya ishlab chiqaradigan idishlar koronavirusga qarshi 40 dan ortiq vaksina uchun qo‘llanadi. Nashr Stevanato boyligini 1,8 milliard dollarga baholagan.
Forbes’ning yozishicha, 2020-yil oxiriga kelib dunyodagi 2,2 mingdan ortiq milliarder 1,9 trillion dollarga boyib ketdi. Barcha milliarderlarning umumiy boyligi 11,4 trillion dollarga baholanmoqda — bu ularning 2019-yil 31-dekabr holatiga nisbatan 20 foizga ko‘p. Milliarderlar boyligining oshishiga asosiy sabab yil davomida davom etgan fond bozorlaridagi qimmatbaho qog‘ozlar narxining o‘sishi bo‘ldi.
Yil davomida hammadan ko‘ra SpaceX va Tesla rahbari asoschisi Ilon Maskning boyligi o‘sib, 110 milliard dollardan 137 milliard dollarga yetdi. U dunyodagi eng boy odamlar reytingida uchinchi o‘ringa ko‘tarildi. Mask boyligining o‘sishini 630 foizga qimmatlagan Tesla Motors aksiyalari ta’minladi.
Izoh (0)