Россия Ташқи ишлар вазирлигидан 1 млн доллар пул йўқолгани хабар берилди. У ароқдан бўшаган қутида сақланган

Россия Ташқи ишлар вазирлигининг Москвадаги бош биносидан бир миллион доллардан зиёдроқ пул йўқолган, деб ёзади Meduza. Бу ҳақда «РЕН ТВ» телеканали ҳеч қандай манбаларга таянмаган ҳолда хабар берган. Ҳодиса бир йил олдин юз берган, аммо шу пайтгача бу ҳақда маълум бўлмаган.

Пул ТИВ валюта-молия департаменти етакчи эксперт-мутахассиси Наталя Агальцованинг кабинетидан йўқолган. Буни 2019 йил 19 декабрда, Агальцова йирик қийматдаги пулни банкка топшириши керак бўлган куни пайқаб қолишган.

Бундан 20 кун аввал у бир ярим миллион долларни Россиянинг Эрондаги элчихонасидан олган. Бу консуллик хизматлари учун тўлов бўлган. Элчихона АҚШнинг Эронга қарши санкциялари туфайли пулни банк ўтказмаси орқали юбора олмаган, шу сабабли у Россияга дипломатик почта билан жўнатилган. «РЕН ТВ» қайд этишича, бундай амалиёт нафақат Россия, балки бошқа мамлакатлар дипломатик муассасалари учун ҳам хосдир. Бир ярим миллион доллар «Абсолют» ароғидан бўшаган қутида етиб келган.

Пул банкка топшириладиган куни Агальцова бошлиғига қўнғироқ қилиб, ўзини ёмон ҳис қилаётгани ва ишга кечроқ келиши ҳақида огоҳлантирган. Унинг кабинетини очиб, ярмигача нақд пул билан тўлдирилган инкассатор сумкасини топишди. Тафтиш натижасида Агальцованинг кабинетида умумий қийматдан 1,066 миллион доллар камомад аниқланган. 16 декабрь куни ўтказилган аввалги тафтишда эса ҳамма пуллар жойида бўлган. Кузатув камералари Агальцованинг 18 декабрь куни кабинетдан иккита «ҳажмдор пакетлар» билан чиқиб кетганини кўрсатган.

ТИВ ходимаси қўлга олинган. Унинг сўзларига кўра, 16 декабрь куни унга банкка топшириш учун 1,38 миллион доллар пулни тайёрлаш буюрилган. У «Абсолют»дан бўшаган қутини очиб, кўрсатмаларга қарамасдан, пулни бир ўзи санаб чиқа бошлаган. Қутида 150 даста 100 долларлик купюра бўлиши керак эди. Бироқ Агальцова иддао қилишича, 100 долларлик дасталар фақат тепа қаторда бўлган; пастда эса пуч дасталар бўлган — уларнинг фақат биринчи қаватидаги купюралар 100 долларлик бўлган, қолган ҳаммаси эса бир долларлик бўлган.

Агальцова саросимага тушиб қолганини ва камомаднинг бир қисмини кассадаги пуллар ҳисобидан, яна бир қисмини эса ўзининг 200 минг доллар жамғармаси ва уч миллион рубллик кредит ҳисобидан ёпишга қарор қилганини айтди. Аммо унга кредит беришмаган. 19 декабрь куни эрталаб у ўзи бирга яшаган Василий Маковоз номига васиятнома расмийлаштириб, дала ҳовлига кетган. У ерда, Агальцованинг сўзларига кўра, у ўз жонига қасд қилишга уринган, аммо бу муваффақиятсиз бўлган. Кейинроқ у дала ҳовлида қўлга олинган.

Агальцова билан бирга Маковоз ҳам қўлга олинган. Унинг айтишича, 18 декабрь куни Агальцова дала ҳовлига келиб, ишда муаммолари борлигини айтган ва стол устига бир даста пул қўйган. Бу ерда 20 минг доллар борлигини ва уни дала ҳовлидаги қўшнига сақлаш учун бериш кераклигини айтган. Агальцованинг ўзи қўшнисига 200 минг доллар берганлигини айтган. Полиция эса қўшнидан 149 минг доллар пул топган.

Маковозга айблов эълон қилмасдан қўйиб юборишган. У Агальцова кўрсатган пул қаердан келганини билмагани, уни Агальцованинг ўз жамғармаси деб ўйлаганини айтганидан кейин гумонланувчи эмас, гувоҳга айланган. Агальцованинг ўзи талон-торожда айбланмоқда. У ҳибсда сақланган, лекин у дастлаб уй қамоғига ўтказилди, кейин эса чиқиб кетмаслик ҳақидаги тилхат билан озод этилди. ТИВдан йўқолган пуллар ҳалигача топилмаган. Ёлғон детекторида ўтказилган текширув кўрсатишича, Агальцова пулларнинг қаердалигини билади, дея қайд этади «РЕН ТВ».

ТИВ пул йўқолганини тасдиқлаган. «2019 йилда Россия ТИВ Валюта-молия департаменти кассасидан йирик қийматдаги нақд пул йўқолганини аниқлади. Пулларнинг йўқолиши ҳолати бўйича вазирлик раҳбарияти дарҳол ҳуқуқ-тартибот органларига мурожаат қилди. Текширув чоғида валюта-молия департаменти ходимасига айблов қўйилди», — дея маълум қилди муассаса вакили «РИА Новости»га.

Иш бўйича тергов якунланган, суд 30 декабрь куни бўлиб ўтади, деб хабар берди «Москва» агентлиги.