Odam savdosi va majburiy mehnatga qarshi kurash milliy komissiyasining navbatdagi yig‘ilishi 4-dekabr, juma kuni bo‘lib o‘tdi, deb xabar beradi Oliy Majlis Senati matbuot xizmati. Yig‘ilishda 2020-yilgi paxta mavsumida kuzatilgan majburiy mehnat holatlari bo‘yicha axborot berilgan.

Foto: “O‘zpaxtasanoat”

“Kun.uz”ning yozishicha, paxta mavsumi bilan bog‘liq eng ko‘p majburiy mehnat holati Namangan viloyatida aniqlangan. Respublika bo‘yicha qayd etilgan holatlarning 42,2 foizi ushbu hudud hisobiga to‘g‘ri keladi. Bir necha bor ogohlantirishlarga qaramay, paxta masalalariga tuman hokimlari aralashuvi ham viloyatda qayd etilgan.

Shuningdek, mavsum davomida majburiy mehnatga jalb qilish boshqa hududlarda ham, xususan, Jizzax viloyatida 7 ta, Toshkent viloyatida 6 ta, Surxondaryo viloyatida 5 ta, Xorazm viloyatida 3 ta, Buxoro, Andijon, Qashqadaryo, Navoiy, Farg‘ona viloyatlarida bittadan kuzatilgan. Bundan tashqari, 61 ta holatda mehnat shartnomasi tuzilmaganligi, 34 ta holatda mehnat sharoitlari yaratilmaganligi, 13 ta holatda mehnat vazifasini bajarmaganligi, 17 ta holatda ish haqining o‘z vaqtida to‘lanmaganligi aniqlangan.

“Majburiy mehnatga sharoit yaratib berilganligi uchun 5 ta tuman hokimiga chora ko‘rish bo‘yicha kiritilgan takliflarimiz qo‘llab-quvvatlanib, Vazirlar Mahkamasi farmoyishiga asosan Chortoq (A.Otaxo‘jayev), Uchqo‘rg‘on (A.Vahobov), Ohangaron (A.Abdullayev), O‘rta Chirchiq (O.Nurmatov), Urganch (F.Sharipov) tuman hokimlariga hayfsan berildi va ushbu holat yana takrorlanadigan bo‘lsa, egallab turgan lavozimidan ozod etilishi bo‘yicha ogohlantirildi”, — deydi yig‘ilishni olib borgan komissiya raisi Tanzila Norboyeva.

Yig‘ilishda 2020-yil davomida mehnat qonunchiligini buzganligi uchun 170 nafar mansabdor shaxsga jami 652 million so‘mdan ziyod miqdorda ma’muriy jarima tayinlangani, majburiy mehnatga yo‘l qo‘yganligi uchun 42 nafar mansabdor shaxs ma’muriy javobgarlikka tortilgani aytib o‘tildi.

Komissiya yig‘ilishi xulosasiga asosan, 2021-yildan boshlab nafaqat paxtachilik, balki boshqa sohalarda ham yo‘l qo‘yilayotgan majburiy mehnat holatlari monitoringini yuritish bo‘yicha ko‘rsatma berilgan.

Avvalroq O‘zbekistonda 2020-yilgi paxta yig‘im-terimi mavsumida joylarda 2570 dan ortiq tashkilot, fermer xo‘jaligi va klasterlarda o‘tkazilgan monitoring natijasida mehnat munosabatlariga rioya qilinishi yuzasidan 158 nafar mansabdor shaxs ma’muriy javobgarlikka tortilgani to‘g‘risida xabar berilgandi.

Eslatib o‘tamiz, O‘zbekistonda 2020-yilgi paxta rejasi 99,4 foizga bajarilgan.