O‘zbekistondagi umumiy o‘rta ta’lim muassasalarida madaniy-ma’rifiy yo‘nalishdagi tadbirlar hamda turli to‘garak, seksiya va klublar faoliyati tiklanadi.
XTV matbuot xizmatining ma’lum qilishicha, bu haqda xalq ta’limi vazirining “Umumta’lim muassasalarida ma’naviy-ma’rifiy ishlarni va o‘quvchilarning bo‘sh vaqtlarini mazmunli tashkil etish to‘g‘risida”gi buyrug‘ida belgilandi.
Vazirlik xabariga ko‘ra, o‘quvchilarning ta’lim olishiga qo‘shimcha sharoit yaratish, darsdan bo‘sh vaqtini mazmunli tashkil etish maqsadida fan to‘garaklari, shuningdek, 5 ta muhim tashabbus to‘garaklari ham to‘liq faoliyat ko‘rsatadi.
Bundan tashqari, o‘quvchilarning o‘qishga bo‘lgan motivatsiyasini oshirish maqsadida “Yil o‘quvchisi”, “Sinf lideri”, “Tadbirkor o‘quvchi” aksiya va musobaqalari tashkil etiladi.
Shuningdek, 21-dekabrdan boshlab respublika ixtisoslashtirilgan davlat umumta’lim maktablari, Xalq ta’limi vazirligi tasarrufidagi barcha turdagi maktab-internatlarda xalq deputatlari tuman (shahar) Kengashlari qarori bilan o‘quvchilar an’anaviy tarzda ta’lim olishi uchun barcha turdagi maktab-internatlar yotoqxonasi faoliyati sanitariya-epidemiologik talablar asosida tashkil etiladi. Ota-onalar ixtiyorida ushbu maktablarda farzandlarini an’anaviy yoki masofaviy ta’lim shaklini tanlash imkoniyati qoldiriladi.
Eslatib o‘tamiz, Respublika maxsus komissiyasining qarori bilan 2020-yil 10-iyuldan boshlab o‘quv kurslari va har qanday to‘garaklar faoliyati to‘xtatilgandi. 15-avgustdan boshlab o‘quv kurslari va markazlari faoliyatini qayta yo‘lga qo‘yishga ruxsat berildi.
Izoh (0)