Isroilda 27-dekabr soat 17:00 dan yangi — pandemiya boshidan buyon uchinchi karantin boshlanadi. Bu haqdagi qaror mamlakat hukumati tomonidan Sog‘liqni saqlash vazirligi taklifiga asosan qabul qilindi, deb xabar bermoqda “Interfaks”.
Karantin ikki haftadan ko‘proq yoki sutkalik kasallanish ko‘rsatkichi 1000 kishiga qisqarguncha davom etadi. Hozirgi paytda bir sutkada aniqlanayotgan yangi holatlar soni 4000 taga yaqinlashmoqda.
27-dekabrdan Isroilda nooziq-ovqat savdosi bilan shug‘ullanuvchi barcha do‘konlar faoliyatini to‘xtatadi, barcha ko‘ngilochar tadbirlar taqiqlanadi. Mijozlar bilan to‘g‘ridan to‘g‘ri ishlamaydigan kompaniyalar ish joyidagi xodimlari sonini ikki baravar qisqartirishi kerak bo‘ladi. Shuningdek, jamoat transporti faoliyati qisman cheklanadi.
Avvalgi karantinlardan farqli ravishda bolalar bog‘chalari, shuningdek, maktablarning kichik va katta sinflari darslarni davom ettiradi, biroq ta’lim jarayoni qisqartirilgan jadval asosida olib boriladi.
Fuqarolar o‘z uyidan bir kilometrdan uzoq masofaga ketishi taqiqlanadi, bolalarni maktabga olib borish yoki emlash uchun borish bundan mustasno. Mehmonga yoki qarindoshlarni ko‘rishga borish taqiqlanadi, biroq ko‘chada sport bilan shug‘ullanish mumkin bo‘ladi.
Mamlakat rasmiylari Rojdestvo bayramlarida 24-dekabr kuni kechqurundan 25-dekabr soat 20:00 gacha, shuningdek, 6-yanvar kechqurundan 7-yanvar kuni kechqurungacha bayram ibodatlarini o‘tkazishga ruxsat beradi.
Isroilda koronavirusga qarshi emlash boshlandi, buning uchun Pfizer va BioNTech kompaniyalari tomonidan yaratilgan vaksinadan foydalanilmoqda.
Isroilda 23-dekabr kuni koronavirusning Buyuk Britaniyada aniqlangan shtammi bilan kasallangan to‘rt kishi aniqlangan.
Avvalroq Isroil hukumati koronavirusning yangi shtammi tufayli xorijliklarning mamlakatga kirishini taqiqlagani haqida xabar berilgandi.
Izoh (0)