Буюк Британия ва Европа Иттифоқи Brexit’дан кейинги ўзаро ҳамкорлик шартларини келишиб олди. Бу ҳақда Буюк Британия бош вазири Борис Жонсоннинг офиси маълум қилди, деб хабар бермоқда Meduza.
«Бу келишув Британия жамиятига 2016 йилдаги референдумда ва ўтган йилдаги парламент сайловида берилган ваъдаларнинг барчасини амалга оширишга имкон беради», — дейилади Борис Жонсоннинг офиси хабарида.
Борис Жонсоннинг ўзи Twitter’га юқорига кўтарилган бош бармоқларини кўрсатиб тушган расмини жойлаган ва «Келишув имзоланди», дея изоҳ берган.
https://twitter.com/BorisJohnson/status/1342123159181516802
Европа Иттифоқи ва Буюк Британия ўртасидаги келишув савдо, транспорт қатнови, балиқчилик, энергетика соҳаларидаги келгуси муносабатларга, хавфсизлик соҳасидаги ҳамкорликка ва бошқа соҳаларга тааллуқли.
Келишув 2021 йилнинг 1 январидан кучга кириши керак. Агар келишув имзоланмаганда 2021 йилдан Буюк Британия ва Европа Иттифоқи эркин савдодан божли ва квотали савдога ўтган бўларди, бу икки томон бизнеси учун ҳам йўқотишларга олиб келган бўлади.
Буюк Британия аҳолиси 2016 йилда ўтказилган референдумда Европа Иттифоқидан чиқиш учун овоз берди. Лондон ва Брюссель чиқиш бўйича музокараларни бошлади, мазкур чиқиш жараёни 2017 йилнинг июнь ойида Brexit номини олди.
Бир неча марта ортга сурилишлардан кейин Буюк Британия 2020 йилнинг 1 февралида Европа Иттифоқи таркибидан чиқди. Томонлар янги савдо келишуви имзолангунигача Буюк Британия учун Европа Иттифоқининг ягона савдо меъёрлари амал қилишига келишиб олганди.
Мазкур келишувни имзолаш муддати 2020 йилнинг 31 декабрида тугаши керак эди.
Изоҳ (0)