O‘zbekistonning tashqi savdo aylanmasi 2020- yilning yanvar–noyabr oylari yakuniga 32,9 milliard dollarni tashkil etib, 2019-yilning mos davriga nisbatan 4,8 milliard dollarga yoki 12,9 foizga kamaydi, deb xabar bermoqda Davlat Statistika qo‘mitasi matbuot xizmati.
Tashqi savdo aylanmasida eksport hajmi 14,1 milliard dollarga (10,5 foizga kamaygan) va import hajmi 18,7 milliard dollarga (14,7 foizga kamaygan) yetgan. Hisobot davrida 4,57 milliard dollar qiymatida passiv tashqi savdo balansi qayd etilgan.
Bu vaqt davomida tashqi savdo aylanmasining nisbatan salmoqli hissasi Xitoy (17,4 foiz), Rossiya (15,4 foiz), Qozog‘iston (7,9 foiz), Janubiy Koreya (5,8 foiz), Turkiya (5,7 foiz), Qirg‘iziston (2,5 foiz) va Germaniya (2,2 foiz) bilan qayd etilgan.
Eksport tarkibida yetakchi o‘rinni oltin egalladi — 40,9 foiz. Undan keyingi o‘rinlarni sanoat mahsulotlari (18,3 foiz), oziq-ovqat mahsulotlari va tirik hayvonlar (8,6 foiz), kimyoviy moddalar va shunga o‘xshash mahsulotlar (5,2 foiz) egalladi.
Ko‘rsatilgan davrda MDH mamlakatlariga turli xil tayyor mahsulotlar, mashinalar va transport uskunalari, sanoat tovarlari, shuningdek, ichimliklar va tamaki eksporti bo‘yicha eng tez o‘sish kuzatildi. Pasayish birinchi navbatda mineral yoqilg‘i, kimyoviy moddalar, oziq-ovqat mahsulotlari, hayvonot va o‘simlik moylari eksportida qayd etildi.
Import tarkibida eng katta ulush, mashinalar va transport asbob-uskunalari (37,6 foiz), sanoat tovarlari (17,2 foiz) hamda kimyoviy vositalar va shu kabi mahsulotlar (13,8 foiz) hisobiga to‘g‘ri keldi.
Eslatib o‘tamiz, oktabr oyida O‘zbekiston tashqi savdo aylanmasi 4,2 milliard dollarga, sentabr oyida 3,7 milliard dollarga kamaygani to‘g‘risida xabar berilgandi. Shuningdek, mamlakatning oltin-valyuta zaxiralarida ketma-ket uchinchi oy kamayish qayd etilgandi.
Izoh (0)