Тошкентдаги Сергели туманини иссиқлик энергияси билан таъминловчи «Тошиссиққувати» ДУКга қарашли «Саноат Энергия» қозонхонасида йирик миқдордаги табиий газ ўғирлангани юзасидан жиноят иши қўзғатилди, деб хабар бермоқда «Gazeta.uz», Бош прокуратура матбуот хизматига таяниб.
Эслатиб ўтамиз, декабрь ойи бошларида қозонхона раҳбари қозонхона ҳудудидаги бинода табиий газдан ноқонуний равишда фойдаланган ҳолда оҳак ишлаб чиқариш фаолиятини йўлга қўйгани ҳақида хабар берилганди.
Энергетика вазирлиги ушбу объектда табиий газни ноқонуний истеъмол қилиш ҳажми 571,3 минг куб метрни ҳамда ушбу ноқонуний хатти-ҳаракатлар натижасида газ таъминоти ташкилотларига етказилган зарар, дастлабки ҳисоб-китобларга кўра, 571,3 миллион сўмдан зиёдни ташкил этганини маълум қилган.
Ҳолат юзасидан Тошкент шаҳар прокуратураси 16 декабрь куни Жиноят кодексининг 205-моддаси 2-қисми билан (жуда кўп миқдорда зарар етказган ҳолда ҳокимият ёки мансаб ваколатини суиистеъмол қилиш) жиноят иши қўзғатган. Айни пайтда Сергели туман прокуратураси дастлабки тергов ҳаракатларини олиб бормоқда.
Изоҳ (0)