Самарқанд вилояти аҳолисининг табиий газдан қарздорлиги 785 миллиард сўмни ташкил этади. Қарздорлик йил бошига нисбатан 163,3 миллиард сўмга ошган. Бу ҳақда халқ депутатлари Самарқанд вилояти Кенгашининг ўн тўққизинчи сессиясида вилоят ҳокими Эркинжон Турдимов маълум қилди, дея хабар берди «Дарё» мухбири.
Вилоят ҳокимининг маълум қилишича, вилоятда энг катта қарздорлик Самарқанд шаҳри ҳисобига тўғри келиб, ҳозирда шаҳар аҳолисининг газдан қарздорлиги 313,9 миллиард сўмни ташкил қилади. Шунингдек, Пастдарғом туманида 118,7 миллиард, Самарқанд туманида эса 72,4 миллиард сўмлик қарздорлик мавжуд.
«Бугун вилоятда табиий ва суюлтирилган газ танқислиги сезилмоқда. Вилоят аҳолиси учун бир ойлик табиий газ талабга нисбатан 34 миллион 307 минг куб кам етказилмоқда. Бу эса ўз навбатида Самарқанд шаҳри, Пайариқ, Ургут, Пастдарғом ва Самарқанд туманларида кўпроқ сезилмоқда», — дейди вилоят ҳокими Эркинжон Турдимов.
Самарқанд вилоятида бугунги кунда 744 та маҳалладаги 442 минг аҳоли суюлтирилган газ билан таъминланмоқда.
2020 йилда 25 миллиард сўмлик газ тармоқлари реконструкция қилинган. Айниқса, Оқдарё ГРСдан Ўзбектракт, Шоҳизинда, А.Шомуродов кўчалари орқали Пенжикент кўчасигача диаметри 325 мметрли 11,5 км юқори босимли газ қувурларида қурилиш-монтаж ишлари олиб борилган. Рўдакий ва Бўстансарой кўчаларида диаметри 530 мметрли (0,8 км) ер ости газ қувурлари янгиланган.
Изоҳ (0)