Tomoshabinlar e’tiborini tortish uchun hayotda sevishgan juftliklar rolini o‘ynagan Bollivud aktyorlari (foto)

Kino va san’at olamida loyihalar mashhurlikka erishishi uchun turli yo‘l va uslublar tanlanadi. Ijodkorlar o‘zlarini “oppoq” ko‘rsatadi, muxlislarni ularning shaxsiy hayotiga aralashishda ayblaydi, ammo shu bilan birga piar qilish uchun yo‘q munosabatlar haqida yolg‘on ma’lumotlar tarqatadi yoki tarqatilishiga rozi bo‘ladi. Bunga film va serial qahramonlarining hayotda ham uchrashishi muxlislar uchun qiziq va ishonarli, degan tushuncha sabab bo‘ladi.

Sonakshi Sinxa va Shahid Kapur

2013-yilda suratga olingan “R...Rajkumar” filmi premyerasidan avval Shahid va Sonakshining piar agentlari tomonidan muxlislarni ularning uchrashayotganiga ishontirish aksiyasi boshlab yuborilgan. Juftlik “Karan bilan qahva” ko‘rsatuviga birga tashrif buyurgan va savollarga oralarida bir gap borligiga iddao qilgandek javob bergan. Film tomoshabinlar tomonidan iliq qabul qilingan, lekin loyiha budjeti qoplab olinganidan keyin ovoza bo‘lgan munosabatlardan asar ham qolmagan.

Sonakshi Sinxa va Arjun Kapur

2014-yilda gazetalarda Sonakshining yana “G‘azab” filmidagi hamkasbi Arjun bilan o‘rtalarida nimadir borligi haqida mish-mishlar yozila boshlagan. Bu vaqtda juftlik munosabatlarni qat’iy inkor qilmagan, ammo shu bilan birga bir-birini bolaligidan bilishi va o‘rtalarida hech gap yo‘q qabilida ma’lumot bergan. Film ekranga uzatilib, omadsizlikka uchraganidan keyin esa hammasi shu zahoti tugagan.

Aliya Bxatt va Arjun Kapur

“Ikki shtat” (2014) filmining suratga olish jarayonida Aliya va Arjun kadr ortidagi munosabatlarni inkor qilgan, ammo shu bilan birga rol ijro qilish juda ham yoqimli bo‘lganini ham bildirgan. Film prokatga chiqib, mashhurlikka erishganidan keyin muxlislar Aliyaning aslida “Yil talabasi” filmida birga suratga tushgan hamkasbi Siddxart Malxotra bilan uchrashishi haqida xabar topgan.

Pariniti Chopra va Aditya Roy Kapur

“Sevgi bazmi” filmining suratga olish jarayonida Adityaning Parinitiga ko‘ngil qo‘ygani haqida gaplar tarqalgan. Ammo film ekran yuzini ko‘rganidan keyin mish-mishga sabab bo‘ladigan shubhali voqealar ham to‘xtagan.

Shahid Kapur va Amrita Rao

2006-yil hind matbuotida “Unashtiruv” filmining suratga olish maydonchasida Shahid va Amrita o‘rtasidagi sevgi borligi haqida mish-mishlar tarqalgan. Juftlik qat’iyan inkor qilgan va bunga muxlislar film premyerasidan keyingina ishongan.

Malayka va Arbaaz Xon

Ushbu juftlikda yuqoridagilardan farqli o‘laroq hammasi boshqacha bo‘lgan. 2008-yilda ularning ayrilayotgani haqida ma’lumot tarqagan, ammo mashhurlar keyinchalik reklama uchun shunday xabar tarqatganini ma’lum qilgan.