Томошабинлар эътиборини тортиш учун ҳаётда севишган жуфтликлар ролини ўйнаган Болливуд актёрлари (фото)

Кино ва санъат оламида лойиҳалар машҳурликка эришиши учун турли йўл ва услублар танланади. Ижодкорлар ўзларини «оппоқ» кўрсатади, мухлисларни уларнинг шахсий ҳаётига аралашишда айблайди, аммо шу билан бирга пиар қилиш учун йўқ муносабатлар ҳақида ёлғон маълумотлар тарқатади ёки тарқатилишига рози бўлади. Бунга фильм ва сериал қаҳрамонларининг ҳаётда ҳам учрашиши мухлислар учун қизиқ ва ишонарли, деган тушунча сабаб бўлади.

Сонакши Синха ва Шаҳид Капур

2013 йилда суратга олинган «Р...Ражкумар» фильми премьерасидан аввал Шаҳид ва Сонакшининг пиар агентлари томонидан мухлисларни уларнинг учрашаётганига ишонтириш акцияси бошлаб юборилган. Жуфтлик «Каран билан қаҳва» кўрсатувига бирга ташриф буюрган ва саволларга ораларида бир гап борлигига иддао қилгандек жавоб берган. Фильм томошабинлар томонидан илиқ қабул қилинган, лекин лойиҳа бюджети қоплаб олинганидан кейин овоза бўлган муносабатлардан асар ҳам қолмаган.

Сонакши Синха ва Аржун Капур

2014 йилда газеталарда Сонакшининг яна «Ғазаб» фильмидаги ҳамкасби Аржун билан ўрталарида нимадир борлиги ҳақида миш-мишлар ёзила бошлаган. Бу вақтда жуфтлик муносабатларни қатъий инкор қилмаган, аммо шу билан бирга бир-бирини болалигидан билиши ва ўрталарида ҳеч гап йўқ қабилида маълумот берган. Фильм экранга узатилиб, омадсизликка учраганидан кейин эса ҳаммаси шу заҳоти тугаган.

Алия Бхатт ва Аржун Капур

«Икки штат» (2014) фильмининг суратга олиш жараёнида Алия ва Аржун кадр ортидаги муносабатларни инкор қилган, аммо шу билан бирга роль ижро қилиш жуда ҳам ёқимли бўлганини ҳам билдирган. Фильм прокатга чиқиб, машҳурликка эришганидан кейин мухлислар Алиянинг аслида «Йил талабаси» фильмида бирга суратга тушган ҳамкасби Сиддхарт Малхотра билан учрашиши ҳақида хабар топган.

Паринити Чопра ва Адитя Рой Капур

«Севги базми» фильмининг суратга олиш жараёнида Адитянинг Паринитига кўнгил қўйгани ҳақида гаплар тарқалган. Аммо фильм экран юзини кўрганидан кейин миш-мишга сабаб бўладиган шубҳали воқеалар ҳам тўхтаган.

Шаҳид Капур ва Амрита Рао

2006 йил ҳинд матбуотида «Унаштирув» фильмининг суратга олиш майдончасида Шаҳид ва Амрита ўртасидаги севги борлиги ҳақида миш-мишлар тарқалган. Жуфтлик қатъиян инкор қилган ва бунга мухлислар фильм премьерасидан кейингина ишонган.

Малайка ва Арбааз Хон

Ушбу жуфтликда юқоридагилардан фарқли ўлароқ ҳаммаси бошқача бўлган. 2008 йилда уларнинг айрилаётгани ҳақида маълумот тарқаган, аммо машҳурлар кейинчалик реклама учун шундай хабар тарқатганини маълум қилган.