Andijon, Surxondaryo va Xorazm sog‘liqni saqlash boshqarmasi rahbarlari o‘zgardi

Andijon, Surxondaryo, Xorazm Sog‘liqni saqlash boshqarmasiga yangi boshliq hamda Qashqadaryo viloyati Sog‘liqni saqlash boshqarmasi rahbariga yangi birinchi o‘rinbosar tayinlandi, deya xabar qilmoqda Sog‘liqni saqlash vazirligi.

Unga ko‘ra, sog‘liqni saqlash vaziri Abduhakim Hojiboyevning tegishli buyrug‘i bilan Andijon viloyat bolalar ko‘p tarmoqli tibbiyot markazi bosh vrachi vazifasida ishlab kelgan Salohiddin Yusupov viloyat sog‘liqni saqlash boshqarmasi boshlig‘i lavozimiga tayinlandi.

Salohiddin Yusupov o‘z faoliyati davomida Andijon viloyat yuqumli kasalliklar shifoxonasi bosh vrachi, viloyat sog‘liqni saqlash boshqarmasi boshlig‘i o‘rinbosari kabi lavozimlarda ham faoliyat yuritgan.

Shuningdek, sog‘liqni saqlash vazirining tegishli buyrug‘i bilan Surxondaryo viloyat ko‘p tarmoqli tibbiyot markazi bosh vrachi lavozimida ishlab kelgan Komil Abduvohidov viloyat sog‘liqni saqlash boshqarmasi boshlig‘i etib tayinlandi.

Komil Abduvohidov Respublika shoshilinch tibbiy yordam ilmiy markazi Termiz filiali direktori, viloyat sog‘liqni saqlash boshqarmasi boshlig‘i va boshqarma boshlig‘ining birinchi o‘rinbosari kabi lavozimlarda faoliyat yuritgan.

Shu bilan birga, O‘zbekiston Prezidenti huzuridagi Davlat xizmatini rivojlantirish agentligi Xorazm viloyati filiali rahbari vazifasida ishlab kelgan Inoyat Hojiyev Xorazm viloyat sog‘liqni saqlash boshqarmasi boshlig‘i lavozimiga tayinlandi.

Inoyat Hojiyev o‘z faoliyati davomida Moliya vazirligi huzuridagi budjetdan tashqari Pensiya jamg‘armasi Xorazm viloyati boshqarmasi boshlig‘i, Oliy Majlis Qonunchilik palatasining Mehnat va ijtimoiy masalalar qo‘mitasi a’zosi, keyinchalik yangi tashkil qilingan Fuqarolarning sog‘lig‘ini saqlash masalalari qo‘mitasining raisi kabi mas’ul lavozimlarda ham faoliyat yuritgan.

Bundan tashqari, vazirlik huzuridagi tibbiy ijtimoiy xizmatlar agentligiga qarashli “Qarshi sanatoriysi” bosh vrachi vazifasida ishlab kelgan Shavkat Mamadiyev Qashqadaryo viloyat sog‘liqni saqlash boshqarmasi boshlig‘ining birinchi o‘rinbosari lavozimiga tayinlandi.

Shavkat Mamadiyev o‘z faoliyati davomida Shahrisabz tuman tibbiyot birlashmasi bosh vrachi, Respublika shoshilinch tibbiy yordam ilmiy markazi Qashqadaryo filiali vrach-endoskopisti, viloyat sog‘liqni saqlash boshqarmasiga qarashli xususiylashtirish va pullik xizmatni tashkil etish bo‘limi boshlig‘i kabi lavozimlarda ham faoliyat yuritgan.

Avvalroq Namangan viloyati sog‘liqni saqlash boshqarmasiga yangi rahbar tayinlangani, shuningdek, Xiva va Urganchga yangi hokim tayinlangani haqida xabar berilgandi.