Turkiyaning Konya shahrida mutafakkir Jaloliddin Rumiy vafotining 747 yilligi munosabati bilan “Shabi arus” marosimlari doirasida madaniy tadbirlar boshlangan. Bu haqda “Daryo” muxbiri xabar berdi.
Turkiya madaniyat va turizm vazirligi tashabbusi bilan o‘zbekistonlik jurnalistlar ham dunyoning bir qancha davlatlari ommaviy axborot vositalari vakillari qatorida ularda ishtirok etmoqda.
Ma’lumki, Mavlono Jaloliddin Rumiy XIII asrning buyuk faylasufi, olim, dinshunos va shoirlaridan biri bo‘lgan. U 1207-yilda Balx shahrida tug‘ilib, 1273-yil 17-dekabrda Konya shahrida vafot etgan. Rumiyning o‘zi vasiyat qilganidek, uning o‘limi ayriliq emas, aksincha, yaratgan bilan uchrashuv (vuslat) kuni sifatida nishonlanib, “Shabi arus”, deb nomlanadi. Mavlaviya tariqatiga ko‘ra odamlar ikki marta dunyoga keladi: birinchi galda onadan, ikkinchi galda ruhiy (o‘z tanasidan). Ikkinchi ruhiy tug‘ilish haqiqiysi sifatida qaraladi. Mavlaviya tariqati darveshlari ruhiy yetakchilari Rumiy izidan borib uning ilmiga asoslangan hayotiy prinsiplar asosida umr kechiradi. Rumiy vafoti, vuslat kunida jahonning turli chetlaridagi Mavlono shaydolari Konya shahriga kelib “Shabi arus” marosimlarida qatnashadi.
Bu yil Rumiy vafotiga 747 yil to‘lgani munosabati bilan 7-dekabr kuni Koniya shahrida tadbirlar boshlangan. Uning doirasida turli uchrashuvlar, ilmiy anjumanlar, musiqa va she’r kechalari, Mavlononing hayoti va ijodiga bag‘ishlangan hujjatli film namoyishlari o‘tkaziladi. Tadbirlar Rumiy vafot etgan vuslat kuni — 17-dekabrda o‘z nihoyasiga yetadi. Avvalroq 4 kun davom etishi belgilangan “Shabi arus” marosimi koronavirus pandemiyasi tufayli 2 kunga qisqartirilgan. Ma’lumotlarga ko‘ra, o‘tgan yili vuslat kechasi marosimlarini 39 ming 750 kishi tomosha qilgan.
Eslatib o‘tamiz, pandemiya munosabati bilan Turkiya prezidenti Rajab Toyyib Erdo‘g‘on Yangi yil bayramlari davrida — 31-dekabr kuni soat 21:00 dan 4-yanvar soat 05:00 ga qadar mamlakatda komendantlik soati amal qilishini e’lon qilgan. Avvalroq u 30-noyabr kuni koronavirus tarqalishiga qarshi cheklov choralari kuchaytirilishini ma’lum qilgan, unga ko‘ra, ish kunlari mahalliy vaqt bilan soat 21:00 dan ertalab soat 05:00 gacha mamlakat bo‘ylab amalda bo‘ladigan komendantlik soati kirgan. Dam olish kunlari — juma kuni soat 21:00 dan, dushanba kuni ertalab soat 05:00 gacha odamlarning ko‘chaga chiqishi taqiqlanadi.
Izoh (0)