Туркиянинг Коня шаҳрида мутафаккир Жалолиддин Румий вафотининг 747 йиллиги муносабати билан «Шаби арус» маросимлари доирасида маданий тадбирлар бошланган. Бу ҳақда «Дарё» мухбири хабар берди.
Туркия маданият ва туризм вазирлиги ташаббуси билан ўзбекистонлик журналистлар ҳам дунёнинг бир қанча давлатлари оммавий ахборот воситалари вакиллари қаторида уларда иштирок этмоқда.
Маълумки, Мавлоно Жалолиддин Румий XIII асрнинг буюк файласуфи, олим, диншунос ва шоирларидан бири бўлган. У 1207 йилда Балх шаҳрида туғилиб, 1273 йил 17 декабрда Коня шаҳрида вафот этган. Румийнинг ўзи васият қилганидек, унинг ўлими айрилиқ эмас, аксинча, яратган билан учрашув (вуслат) куни сифатида нишонланиб, «Шаби арус», деб номланади. Мавлавия тариқатига кўра одамлар икки марта дунёга келади: биринчи галда онадан, иккинчи галда руҳий (ўз танасидан). Иккинчи руҳий туғилиш ҳақиқийси сифатида қаралади. Мавлавия тариқати дарвешлари руҳий етакчилари Румий изидан бориб унинг илмига асосланган ҳаётий принциплар асосида умр кечиради. Румий вафоти, вуслат кунида жаҳоннинг турли четларидаги Мавлоно шайдолари Коня шаҳрига келиб «Шаби арус» маросимларида қатнашади.
Бу йил Румий вафотига 747 йил тўлгани муносабати билан 7 декабрь куни Кония шаҳрида тадбирлар бошланган. Унинг доирасида турли учрашувлар, илмий анжуманлар, мусиқа ва шеър кечалари, Мавлононинг ҳаёти ва ижодига бағишланган ҳужжатли фильм намойишлари ўтказилади. Тадбирлар Румий вафот этган вуслат куни — 17 декабрда ўз ниҳоясига етади. Аввалроқ 4 кун давом этиши белгиланган «Шаби арус» маросими коронавирус пандемияси туфайли 2 кунга қисқартирилган. Маълумотларга кўра, ўтган йили вуслат кечаси маросимларини 39 минг 750 киши томоша қилган.
Эслатиб ўтамиз, пандемия муносабати билан Туркия президенти Ражаб Тоййиб Эрдўғон Янги йил байрамлари даврида — 31 декабрь куни соат 21:00 дан 4 январь соат 05:00 га қадар мамлакатда комендантлик соати амал қилишини эълон қилган. Аввалроқ у 30 ноябрь куни коронавирус тарқалишига қарши чеклов чоралари кучайтирилишини маълум қилган, унга кўра, иш кунлари маҳаллий вақт билан соат 21:00 дан эрталаб соат 05:00 гача мамлакат бўйлаб амалда бўладиган комендантлик соати кирган. Дам олиш кунлари — жума куни соат 21:00 дан, душанба куни эрталаб соат 05:00 гача одамларнинг кўчага чиқиши тақиқланади.
Изоҳ (0)