Rossiyaning “Sputnik V” vaksinasi koronavirusning og‘ir holatlariga nisbatan 100 foiz samaradorlik ko‘rsatdi. Bu haqda vaksinaning yaratuvchisi ma’lum qildi, deb yozmoqda Meduza.
“Platseboni qabul qilganlar guruhida koronavirus bilan kasallanganlar orasida og‘ir holatlar soni 20 tani tashkil qilgan, vaksinani qabul qilganlar guruhida esa og‘ir holatlar qayd etilmagan”, — deyiladi xabarda.
Vaksinaning umumiy samaradorligi 91,4 foizga baholanmqoda. Mazkur xulosalar sinovlarning uchinchi (oxirgi) nazorat tekshiruvida olingan ma’lumotlar asosida chiqarilgan.
Vaksina yaratuvchilarining ma’lum qilishicha, 90 foizdan yuqori samaradorlik uchta nazorat tekshiruvining har birida qayd etilgan.
Eslatib o‘tamiz, birinchi oraliq tahlil natijalari vaksina 92 foiz samaradorligini ko‘rsatgan. Keyinroq “Sputnik V” ishlab chiquvchilari 39 ta bemor haqidagi dastlabki ma’lumotlarga asoslanib, o‘z vaksinasi samaradorligini 95 foizga baholagan.
Dekabr oyining boshida Rossiyada COVID-19’ga qarshi ommaviy emlash boshlangani ma’lum qilindi. Moskvada 5-dekabrdan emlash ma’lum toifadagi aholi vakillari uchun boshlandi. Vaksinatsiya uchun “Sputnik V” vaksinasidan foydalanilmoqda.
Izoh (0)