Фарғона вилоятининг Марғилон шаҳрига 2021 йилда «Жаҳон ҳунармандлари шаҳри» мақоми берилиши мумкин. Шунингдек, шаҳарда Мирзакарим қутидор, Отабек ва Кумушнинг рамзий уйлари қурилади. Бу ҳақда Марғилон шаҳри ҳокими Адҳам Зиёвутдинов журналист ва блогерлар билан бўлган матбуот анжуманида маълум қилди, дея хабар берди «Дарё» мухбири.
Таъкидланишича, Марғилондан етишиб чиққан таниқли ижодкор ва санъаткорларнинг уй музейлари ҳам ташкил этилади.
«Марғилонда туризмни ривожлантириш учун катта имконият бор. Аввал шаҳарда иккитагина меҳмонхона бор эди, энди тўққизта бўлди. Уй меҳмонхоналари, хостеллар қурилди. Бунга сабаб эса кейинги йилларда атлас, «Буюк ипак йўли» фолклор фестиваллари ўтказилгани бўлди. Пандемия туфайли тўхтаб қолган бўлса ҳам, атлас фестивалини келаси йил бешинчи марта ўтказишни режалаштирганмиз. Биз, асосан, зиёрат туризмини ривожлантиришга аҳамият берганмиз. Нимагаки бу йил пандемия туризм, хусусан, туристлар оқимига салбий таъсир қилди. Ислом оламида катта обрўга эга бўлган Бурҳониддин Марғиноний айнан шу ерда таълим олган. У ўқиган чиллахона ҳамон мавжуд. Ўша эрда ‘Ҳидоя’ асарини ёзган. Буларга қизиқиш анча юқори бўлади», — деди шаҳар ҳокими.
Айтилишича, шаҳарда 41 та маданий мерос объекти мавжуд.
«Президент топшириғига кўра, воҳадан водийга келаётган меҳмонлар сонини таҳлил қилиш ва сайёҳлик агентликлари билан ҳамкорликда беш кунлик саёҳат пакети ташкил этишни режалаштирганмиз. Сайёҳлар воҳадан олиб келиниб, яна қайтариб олиб бориб қўйилади. Биз Марғилонни Жаҳон ҳунармандлари шаҳарлари рўйхатига киритиш бўйича барча керакли ҳужжатларни топширганмиз. Насиб қилса, шаҳримиз 2021 йилда жаҳон ҳунармандлари шаҳри рўйхатига киритилади.
Марғилонда Узунҳовуз деган тарихий жой бор. Шу ерда 50 сотих майдонда жойлашган эски маҳалла бор. Ҳар қанча ‘сносълар ва янги қурилишлар бўлса ҳам мана шу маҳаллани бузишга бермадик. Отабек ва Кумушнинг уйини айнан шу ердан қуришни ният қилганмиз. Бу бўйича маршрут ҳам тузилган, лойсувоқли уйлардан иборат эски маҳалла ташкил этишни ҳам мақсад қилганмиз. Афсуски, иш кўпайиб кетиб, ташаббус сал тўхтаб қолди. Аммо лойиҳадан воз кечганимиз йўқ, 2021 йилда шу ишни амалга оширамиз. Бунинг учун вилоят ҳокимлигидан ҳам ёрдам берилади. ‘Ўткан кунларъни ўқиган одам борки, албатта, Марғилонни кўришни истайди. Ҳақиқий шу кинодаги жараённи, яъни Кумуш сув олгани ҳовузга чиққан ҳолатини кўрсатиб берамиз. Бутун Ўзбекистондан меҳмонлар келади.
Яқинда ‘Дунё’ меҳмонхонаси қурилди. Ўша меҳмонхонанинг ёнида рамзий тарзда Мирзакарим қутидорнинг уйини қуриш ишлари бошланган», — деган Марғилон шаҳар ҳокими Адҳам Зиёвутдинов.
Таъкидланишича, Марғилон шаҳрида 1000 нафарга яқин ҳунарманд фаолият олиб бормоқда. Марғилон атласлари дунёнинг 167 мамлакатига етказилади. Янги ташкил этилган Ҳунармандчилик марказида 200 дан ортиқ турдаги атлас ва адрас тўқиш, гиламчилик, тикувчилик, ҳунармандчилик маҳсулотлари ишлаб чиқариш йўлга қўйилган. Айни пайтда бу ерда 600 нафар уста иш бошлаган, улар томонидан икки мингга яқин хотин-қизлар ва ёшлар ишга жалб этилган.
Ҳунармандлар бозорида эса 45 нафар ҳунарманд фаолияти йўлга қўйилган бўлиб, 300 та янги иш ўрни яратилган. 35 миллиард сўм маблағ сарфланган марказда 14 та савдо дўкони мавжуд.
Изоҳ (0)