Shavkat Mirziyoyev 12—13-dekabr kunlari Xorazm viloyatida bo‘lib qaytdi. Tashrif yakuni bo‘yicha Urganch shahrida yig‘ilish bo‘lib o‘tdi. “Kun.uz”ning xabar berishicha, yig‘ilishda Prezident viloyatdagi qishloq xo‘jaligi sohasini tanqid qildi.
“Nima uchun Xorazmda meva-sabzavot kam, chunki suvdan foydalanish siyosati yo‘q? Eski tizim bilan ishlab bo‘lmaydi. Dunyo bo‘yicha 2021-yilda oziq-ovqat muammosi bo‘lishi mumkinligi aytilyapti. Biz bunga tayyormizmi?”, — degan Prezident.
Davlat rahbari viloyatdagi qishloq xo‘jaligi holatini Farg‘ona vodiysidagi holat bilan taqqoslab, “Masalan, Namanganda adolatli tizim yo‘lga qo‘yildi, tadbirkorlarga sharoit qilib berildi. Farg‘ona bilan Namanganni tenglashtirib bo‘lmaydi, Farg‘onada katta-katta korxonalar bor. Xorazm Namangandan ham ancha orqada. Namanganga borib, ko‘rib kelinglar, qancha ishlar qilingan. Hokimga ko‘p narsa bog‘liq, izlanish kerak. Namanganda Bozorov hokim vaqtida 10 foiz qishloq xo‘jaligi bilan shug‘ullangan, Xorazmda hokimlar 90 foiz shug‘ullanyapti, lekin foyda yo‘q.
Qaysi soha bo‘yicha Xorazm boshqa viloyatlarga namuna hozir? Sholi va olmani brend qilsak bo‘ladimi? Sholini ‘Temir daftar’dagilarga ektiramiz. Shunda kambag‘allikdan chiqarish yo‘li adolatdan bo‘ladi.
Xorazm viloyati yiliga 80 million dollarlik tekstil mahsulotlari eksport qiladi. Andijonda bu ko‘rsatkich 512 million dollar. Farq bormi? Bitta davlat, qarorlar bir xil-ku. Egilib paxta terasizlar, huzurini boshqa joylar ko‘radi. 25 yil paxta ekib, Xitoyga va Bangladeshga sotdik. Bangladeshda paxta yo‘q, bir yilda 35 milliard dollarlik tayyor mahsulot eksport qilyapti”, — deb aytgan.
“Men 80 foiz tumanlar hokimlari bilan suhbatlashdim. Olgan javoblarim qoniqarli emas. Har bitta tuman hokimi muovini, sektor rahbarlari elim uchun xizmat qilaman desa, Xorazmda hammasi yaxshi bo‘ladi”, — deb ta’kidlagan Shavkat Mirziyoyev.
Bundan avval Prezident viloyatdagi avtomobil yo‘llari holatini tanqid qilib, ularni sifatli ta’mirlash bo‘yicha ko‘rsatmalar bergani haqida xabar berilgan edi.
Izoh (0)