Yoshlar ittifoqi Jizzax shahridagi Yoshlar innovatsion markazini qurish va rekonstruksiya qilish bilan shug‘ullanib, haqini to‘liq ola olmayotgan quruvchi bilan bog‘liq muammo yechim topganini ma’lum qildi, deb xabar bermoqda “Kun.uz”.
Tadbirkor Shuhrat Sotvoldiyevning ma’lum qilishicha, “Yoshlar qurilish invest” MChJ hamda “Jizzax real qurilish ta’mir” MChJ o‘rtasida 14-dekabr kuni “Kelishuv bitimi” imzolangan. Yangi bitimga ko‘ra, tadbirkorning xarajatlari 14,3 milliard so‘mdan 11,4 milliard so‘mga tushirilgan.
“Bugun ushbu hujjatlar asosida Yoshlar ittifoqi markaziy kengashi va Jizzax viloyati hokimligi tomonidan 3,6 milliard so‘mlik mablag‘lar qoplab berildi. Buning uchun ularga minnatdorchilik bildiraman, endi 300 dan ortiq ishchi xizmatchilar o‘z ish haqlarini oladigan bo‘ldi.
Bu holat bo‘yicha ijtimoiy tarmoqlarga chiqishimni maslahat berganlar ham bo‘lgan edi. Asosiysi, masala yechildi. O‘zbekiston Yoshlar ittifoqidan hech qanday da’vo e’tirozim yo‘q”, — deya ma’lum qilgan Shuhrat Sotvoldiyev.
Eslatib o‘tamiz, “Jizzax Real qurilish ta’mir” MChJ direktori Shuhrat Sotvoldiyev imzolagan xat surati ijtimoiy tarmoqlarda tarqalgandi. Xatda tadbirkor Prezident topshirig‘i va bosh vazirning birinchi o‘rinbosari Ochilboy Ramatov tasdiqlagan hujjatga ishonib, Yoshlar ittifoqi uchun Jizzax viloyatida 14,3 milliard so‘mlik binoni deyarli o‘z hisobidan qurgani qayd etilgan. Biroq u Yoshlar ittifoqidan mazkur mablag‘larni ola olmayotganini va shu sababli 15-dekabr kuni ittifoqning markaziy kengashi binosi oldida ochlik e’lon qilmoqchi ekanligini bayon qilgandi.
Izoh (0)