O‘zbekiston Respublikasi tashqi ishlar vaziri Abdulaziz Komilov 2020-yilning 14-dekabr kuni Chexiyaning favqulodda va muxtor elchisi etib tayinlangan Vatslav Yilekni qabul qildi. Bu haqda Tashqi ishlar vazirligi xabar berdi.
Vazir ishonch yorliqlari nusxalarini qabul qilib, elchini yuqori va mas’uliyatli lavozimga tayinlangani bilan tabrikladi va unga muvaffaqiyatli faoliyat tiladi.
Uchrashuvda siyosiy, savdo-iqtisodiy, investitsiya, ta’lim, madaniy-gumanitar va boshqa sohalardagi O‘zbekiston—Chexiya hamkorligini hamda xalqaro va mintaqaviy tashkilotlar doirasidagi o‘zaro munosabatlarni rivojlantirishning dolzarb masalalari ko‘rib chiqildi.
Bo‘lajak turli darajadagi ikki tomonlama tadbirlar, jumladan, tashqi ishlar vazirliklari o‘rtasida siyosiy maslahatlashuvlarning navbatdagi raundini o‘tkazish bilan bog‘liq amaliy masalalari muhokama qilindi.
Tomonlar O‘zbekiston va Chexiya o‘rtasida iqtisodiy diplomatiyani rivojlantirish, O‘zbekiston iqtisodiyoti sohalarida loyihalarni amalga oshirishda Chexiyaning to‘g‘ridan to‘g‘ri investitsiyalari va texnologiyalarini jalb qilishdan o‘zaro manfaatdor ekanligini tasdiqladi.
Avvalroq Abdulaziz Komilov O‘zbekistondagi diplomatik missiyasini yakunlayotgan Ruminiyaning favqulodda va muxtor elchisi Romeo Stanchuni qabul qilgandi.
Izoh (0)