Andijon shahrida yashovchi ayollarning 5374 nafari O‘zbekistonning turli hududlarida, 9593 nafari esa xorijda ishlayotganligi ma’lum bo‘ldi. Bu haqda shahar hokimi Bahrom Haydarov Xalq deputatlari shahar kengashining navbatdagi 14-sessiyasida ma’lum qildi, deya xabar berdi “Daryo” muxbiri.
Xabar berilishicha, “ayollar daftari”ni shakllantirish mobaynida Andijon shahrida yashovchi 30 yoshdan yuqori bo‘lgan 86 215 nafar xotin-qiz ishtirokida so‘rovnomalar o‘tkazilgan. Xatlov natijasiga ko‘ra, 5 ta sohaga taalluqli 23 ta yo‘nalish bo‘yicha 15 750 ta muammo aniqlangan. Muammolarning 10 mingdan ortig‘i qurilish va kommunal, 1050 tasi ijtimoiy, 4314 tasi iqtisodiy, 67 tasi huquq-tartibot sohalariga, 279 tasi esa oila va nikoh masalalariga taalluqliligi aniqlangan. Hozirgi kunga qadar jami 1888 ta muammo o‘z yechimini topgan. So‘rovnomaga ko‘ra, 798 nafar ayol ishlash, 569 nafari kredit olib tadbirkorlikni boshlash, 664 nafari “usta—shogird” usulida hunar hamda 112 nafari davr talab qilayotgan kasb va hunarlarni o‘rganish istagi borligini ma’lum qilgan.
“Xonadonma-xonadon yurish davomida 10 ming nafarga yaqin ayollar xorijda ishlayotganligi ma’lum bo‘ldi. ‘Temir daftar’ga tushib qolgan oilalarning biridan xabar olish jarayonida ularning qizi Turkiyada mehnat qilayotgani aniqlandi. Ona bilan suhbat vaqtida qizi bilan telefon orqali aloqaga chiqishni so‘radik. O‘sha singlimiz bilan gaplashganimda u yerda mahalliy aholi vakillaridan birining uyida oqsochlik qilib, oyiga 300 dollar maosh olayotganligini bildirdi. Unga kuniga ishga olib borib, olib keladigan transport va ikki mahal ovqat bilan ta’minlanasiz. O‘zbekistonda ishlab ham oyiga 300 dollardan ko‘proq pul topishingiz mumkin deganimda, singlimiz yig‘lab yubordi. Bunaqa suhbatlar ko‘p o‘tkazildi. Shuningdek, Rossiyadan ham bir nechta fuqarolarimizni qaytarishga muvaffaq bo‘ldik”, — deydi Bahrom Haydarov.
“Daryo” muxbirining qayd etishicha, shahar hokimi xorijda ishlayotgan migrantlar bilan birma-bir telefon orqali suhbatlashib chiqish niyatida ekanligini bildirgan.
Eslatib o‘tamiz, Prezident Shavkat Mirziyoyev viloyat va tuman hokimlaridan 2020-yilda amalga oshirilgan ishlar yakuni va 2021-yilda rejalashtirilgan ijtimoiy-iqtisodiy rivojlantirishga bag‘ishlangan murojaatnomani keng ommaga taqdim etishni talab qilgan edi.
Izoh (0)