Андижон шаҳрида яшовчи аёлларнинг 5374 нафари Ўзбекистоннинг турли ҳудудларида, 9593 нафари эса хорижда ишлаётганлиги маълум бўлди. Бу ҳақда шаҳар ҳокими Баҳром Ҳайдаров Халқ депутатлари шаҳар кенгашининг навбатдаги 14-сессиясида маълум қилди, дея хабар берди «Дарё» мухбири.
Хабар берилишича, «аёллар дафтари»ни шакллантириш мобайнида Андижон шаҳрида яшовчи 30 ёшдан юқори бўлган 86 215 нафар хотин-қиз иштирокида сўровномалар ўтказилган. Хатлов натижасига кўра, 5 та соҳага тааллуқли 23 та йўналиш бўйича 15 750 та муаммо аниқланган. Муаммоларнинг 10 мингдан ортиғи қурилиш ва коммунал, 1050 таси ижтимоий, 4314 таси иқтисодий, 67 таси ҳуқуқ-тартибот соҳаларига, 279 таси эса оила ва никоҳ масалаларига тааллуқлилиги аниқланган. Ҳозирги кунга қадар жами 1888 та муаммо ўз ечимини топган. Сўровномага кўра, 798 нафар аёл ишлаш, 569 нафари кредит олиб тадбиркорликни бошлаш, 664 нафари «уста—шогирд» усулида ҳунар ҳамда 112 нафари давр талаб қилаётган касб ва ҳунарларни ўрганиш истаги борлигини маълум қилган.
«Хонадонма-хонадон юриш давомида 10 минг нафарга яқин аёллар хорижда ишлаётганлиги маълум бўлди. ‘Темир дафтаръга тушиб қолган оилаларнинг биридан хабар олиш жараёнида уларнинг қизи Туркияда меҳнат қилаётгани аниқланди. Она билан суҳбат вақтида қизи билан телефон орқали алоқага чиқишни сўрадик. Ўша синглимиз билан гаплашганимда у ерда маҳаллий аҳоли вакилларидан бирининг уйида оқсочлик қилиб, ойига 300 доллар маош олаётганлигини билдирди. Унга кунига ишга олиб бориб, олиб келадиган транспорт ва икки маҳал овқат билан таъминланасиз. Ўзбекистонда ишлаб ҳам ойига 300 доллардан кўпроқ пул топишингиз мумкин деганимда, синглимиз йиғлаб юборди. Бунақа суҳбатлар кўп ўтказилди. Шунингдек, Россиядан ҳам бир нечта фуқароларимизни қайтаришга муваффақ бўлдик», — дейди Баҳром Ҳайдаров.
«Дарё» мухбирининг қайд этишича, шаҳар ҳокими хорижда ишлаётган мигрантлар билан бирма-бир телефон орқали суҳбатлашиб чиқиш ниятида эканлигини билдирган.
Эслатиб ўтамиз, Президент Шавкат Мирзиёев вилоят ва туман ҳокимларидан 2020 йилда амалга оширилган ишлар якуни ва 2021 йилда режалаштирилган ижтимоий-иқтисодий ривожлантиришга бағишланган мурожаатномани кенг оммага тақдим этишни талаб қилган эди.
Изоҳ (0)