Mo‘jazgina uy, mashinalar va ko‘p qirrali inson. “Borussiya D”ning “billur oyoqli” afsonasi Marko Roys qanday hayot kechiradi?

Yulduzlarni yetishtirib, ularni boshqa klublarga katta pulga sotadigan Dortmundning “Borussiya” klubini barcha yaxshi biladi. Aynan ushbu klubdan juda ko‘plab yulduz darajasidagi futbolchilar yetishib chiqqan va chiqmoqda. Robert Levandovski, Pyer-Emerik Obameyang, Genrix Mxitaryan, Mario Gyotse, Jeydon Sancho va Erling Holand, shular jumlasidandir. Biroq “arilar” tarkibida shunday futbolchi borki, u uzoq yillardan beri jamoaga sodiq (bunga qaysidir ma’noda uning jarohatlari ham sababchi) qolmoqda. Ha, bu Marko Roys. Tez-tez jarohat olishi tufayli “billur oyoq” sohibi nomini olgan Roys “Borussiya”ning afsonasi hisoblanadi. Xo‘sh, Dortmund afsonasi qayerda yashaydi, qanday mashinalarda yuradi futboldan bo‘sh vaqtlarida nimalar bilan shug‘ullanadi? Quyida ushbu savollarga javob berib o‘tamiz.

Qayerda yashaydi

Markoning qimmatbaho uylari yoki shunga o‘xshash hashamatli villalari yo‘q. U Dortmund klubining yoshlar jamoasida o‘ynagan vaqtida sotib olgan xonadonda yashaydi. Turar joy “Borussiya” stadionidan atigi 15 daqiqalik masofada joylashgan. Uy bir necha oilaga mo‘ljallangan uch qavatli binoda joylashgan.

Uy yengil ranglarda bo‘yalgan bo‘lib, mebellar ham shunga yarasha tanlangan. Futbolchining aytishicha, bu uni qiyin o‘yinlardan so‘ng tinchlantiradi.

Roysning mashinalari

Marko Roysning garajidan bir qancha mashinalar o‘rin olgan. Xususan, Opel Adam (10 ming yevro), Range Rover (65 ming yevro), Aston Martin Vanquish (300 ming yevro) mashinalari.

Shaxsiy hayoti

Marko Roys 2015-yildan beri Skarlet Hartmann ismli model qiz bilan yaqin munosabatlarda. 2019-yilda juftlik qiz farzandli bo‘lishiga qaramay, ular hamon munosabatlarini rasmiylashtirganicha yo‘q.

Do‘stlari kim?

Roysning hayotida bir qancha yaxshi do‘stlar bor, lekin uning eng sadoqatli va yaqin do‘sti bu Mario Gyotse.

Roys va Gyotse “Borussiya” akademiyasida tarbiyalangan, ammo ular turli yosh toifalarida shug‘ullangani uchun faqatgina 2009-yilda, Germaniya terma jamoasi yig‘inida tanishgan. Futbolchilar do‘stligining eng ta’sirli epizodi, 2014-yilgi Braziliyada o‘tkazilgan Jahon chempionatining final uchrashuvida sodir bo‘lgan. Roys o‘sha paytdagi Germaniya terma jamoasining yetakchilaridan biriga aylanishi kerak edi, ammo u so‘nggi pallada jiddiy jarohat oladi va mundialga yo‘l olmaydi. Mario esa Argentinaga qarshi kechgan o‘yinda hal qiluvchi golni urdi va final hushtagidan so‘ng maydonga Markoning ismi tushirilgan libosni olib chiqadi.

Shuningdek, Marko Manuel Akanji va 2013–2018-yillarda “Borussiya”da o‘ynagan Pyer-Emerik Obameyang bilan ham yaxshi munosabatlarga ega.

Futboldan tashqari qiziqishlar

Roys ko‘p qirrali odam bo‘lib, futboldan tashqari stol tennisi va PlayStation o‘ynashni hamda musiqa tinglashni yaxshi ko‘radi. Bundan tashqari u Hot Wheels nomli o‘yinchoq mashinalarini ishlab chiqarishda ishtirok etadi. Shu bilan birga Marko xayriya ishlarini ham unutmaydi va hayotda omadi chopmaganlarga yordam berib keladi. Futbolchi bir necha yillardan buyon Dortmunddagi kasalxonalarda oqqon bilan kurashayotgan bolalarni doimiy ravishda qo‘llab-quvvatlab keladi.

Daromadi

Roys “Borussiya”ning eng yuqori maosh oluvchi futbolchilaridan biri hisoblanadi. Marko 2023-yilning 30-iyuniga qadar mo‘ljallangan shartnomaga ko‘ra, yiliga 10 million yevro maosh oladi.

Bundan tashqari, Puma kompaniyasi bilan imzolangan shartnomaga asosan, futbolchi yiliga yana 2 million yevro qo‘shimcha  daromad ko‘radi. Bundan tashqari, u televizion shartnomalarda ham ishtirok etib turadi.